陸續有世界各地名牌嚟香港上市，好似Prada（1913）噚日開始招股，招股價叫到最高48蚊一股，究竟值唔值？咁要睇吓名牌嘅號召力，同有冇老翻頂爛市。老友同華華講，家陣羅湖商業城啲老翻店賣嘅名牌已經唔係A貨，而係「超A貨」。
乜嘢叫「超A貨」？好多人解讀為仿真度極高嘅假嘢，華華聽手袋業老友話，「超A貨」點止仿真度極高，根本就係堅貨，所以連中環OL甚至女賓架好多時都會幫襯。
堅貨淪落羅湖商業城
點解堅貨會喺羅湖商業城賣？老友話，羅湖商業城見到嘅品牌，通常都有代工廠喺大陸，早十年八年，呢啲廠唔想浪費條生產線，於是就自己設計啲款出嚟，呢啲老翻產品稱為「A貨」。不過，咁做會俾個客告侵權，所以個別腦筋靈活嘅廠佬諗到條更好嘅橋，就係喺啲堅貨出廠前，報公安話唔見咗批貨。唔見咗嗰批貨去咗邊？咪就係去咗羅湖商業城，淪落為「超A貨」囉！
模擬「超A貨」運作圖
李華華
mailto:[email protected]