林寶加料勁谷　透視雙色牛

儘管林寶大牛AventadorLP700-4如箭在弦，但好多林寶Fans早已愛上細牛易揸易泊嘅優點。廠方最近再度催谷LP-560，加入大量改裝靚料之餘，更大玩TwoTone車身，雙色林寶溝得精采，仲招積過阿叻架紫色大牛。

記者：徐影龍
攝影：陳陶鈞

鋼琴令面配鮮色車身

早前到訪過林寶意大利博洛尼亞總部，已實戰過LP560-4Spyder，白色車身襯黑布軟篷頂，雖然嚴格嚟講，算係早已玩過雙色Gallardo，不過今次廠方推出嘅Bicolore雙色特別版，當然更Sharp更靚！起初聽見林寶玩TwoToneColor，以為左一忽右一忽咁Crossover，驚佢變到好騎呢，點知原來簡簡單單玩上下分色；由玻璃窗框到車頂，均以NoctisBlack作塗裝，整個上半車身都係恍如鋼琴鏡面般嘅立立令黑色，下半身共五隻顏色選擇，包括黃、橙、藍、白及灰等色，到港版本就以黑溝黃作配搭，視覺效果相當新鮮，亦凸顯出Gallardo車身更為流線有動感。
除此以外，連四條超貴鍛軨，都換上鈦金屬塗裝，再配上19吋派拉利P-Zero跑胎，有跑味之餘更形矜貴帥氣。

■Bicolore特別版合共五種車身顏色，最鮮色首選黃及橙。

■四出式氣喉及改成黑色的擾流器，更顯霸氣。

■全個車頂用上NoctisBlack塗裝，好似玻璃頂咁靚。

■將鍛軨由黑色變成鈦金屬灰，多輻式幼條設計好睇又易散熱。

■車尾最矚目點，當然係鋼化玻璃下嘅V10引擎。

黑色靚皮黃線車邊

叫得特別版，當然唔只玩車身顏色咁簡單。首先內櫳鋪設黑色Persus頂級靚皮，兼且所有皮位均縫上跟車身相呼應嘅黃色線邊，玩撞色玩得相當徹底。另外中控台下方嘅e-gear轉波位，亦轉成車廂統一嘅啞黑色，而過往屬Option嘅電動控制連發熱功能嘅仿桶椅，喺Bicolore版亦已成標準配備。
以跟舊款Gallardo車價相若嚟計，咁多轉變自然物有所值，最得人歡喜嘅，算係門窗內側嘅Bicolore特別版招牌，雖然Bicolore非限量推出，招牌上並無刻上限量編號，不過單單Bicolore呢個字，已足證你架Gallardo係最新款，淨係呢點已令林寶Fans有晒理由出新車啦！