我已經厭倦血腥嘅殺戮，唔想再喺渾沌世界玩遊戲，唔係喪屍就係超能力，女主角唔係乳搖就係有誇張嘅線條，夠嘞！呢隻game有民歌配樂，清幽背景，仲有純美女主角，雖然都係眼大過口兼打出心口，但可愛打扮真係治癒到成日上高登、思想污穢嘅我。
文：阿洛
日式傳統風味
繼承前作嘅遊戲背景，鍊金術士托托莉被派遣到阿路斯，呢個國家就係位於亞蘭德共和國西北遠方的嘅小國，而女主角梅露露就係呢個國家嘅公主。濃烈活潑味道嘅女主角就係希望成為托托莉徒弟，用鍊金術振興國家嘅純情囡囡，從而展開其冒險之旅。而系統方面則係傳統向，道具特性會繼承兼可自行調配，令變化更多。另有「道具進化」以及「援護防衞」等系統，當然每個角色亦都有自己嘅獨有技能同必殺技。在一片3D立體射擊動作game嘅衝擊之下，呢隻game可以話係六月之中嘅清泉。
玩法似fb中毒Game
《鍊金術士梅露露：亞蘭德的鍊金術士3》，係GUST《鍊金術士》系列嘅最新作，除咗繼承現在少有嘅類近傳統RPG玩法，更加入新系統、新人物。而因為今次主角係某國公主嘅關係，新增「開拓」機能更加令人有玩種花種草修橋鋪路嘅facebook中毒game感覺，耐玩性大增。仲有要留意嘅係女主角梅露露係由明坂聰美配音，加埋名塚佳織等聲優，夜闌人靜又甜又溫暖，正呀喂！
去官網聽歌攞相
講到新嘅「開拓」系統，就係女主角可以靠完成唔同嘅任務而收集點數，點數增加就可以令到官階提升，之後就可以到唔同嘅區域，用戰鬥所得嘅唔同道具建設唔同設施，令國家變成亞蘭德一樣咁欣欣向榮。仲有值得一提嘅係，呢隻game嘅官網（ http://atelier-ps3.jp/meruru/
）有歌聽又有wallpaperdownload，以日本game嚟講可謂相當慷慨，呢個都係令人想撐嘅原因之一。
主機：PS3
類型：角色扮演
廠商：GUST
人數：1人
發售日期：6月23日
