Alina好興奮踩入荔枝山莊，一心諗住可以大食一餐樹上熟靚荔枝，點知：「對唔住，仲有個零星期先熟透，讀者睇完報道再Book場就啱啱好喇。」不過唔緊要，荷花池畔燒拷，加明星級熱鬥小馬跑沙圈玩遊戲，玩足一日，唔難。
打風隨時吹甩荔枝
自2004年起，荔枝山莊都玩起有機耕種綠田園，35畝梯田，現夏當造有茄子、粟米等，全部可以用活動套票交換：「我第一次見種喺地下嘅西瓜，原來香港都種到o架？」至於樹上荔枝如果如無意外可望兩星期後首批見熟，可以在園內任食（由專人採摘）；意外係乜？之唔係啱啱嚇咗大家一嘢嘅颱風莎莉嘉囉，如果有颱風，隨時即刻無荔枝食，所以真係要早去早享受呀！
至於呢度嘅燒烤餐，會以二人起跳，每位$78，燒烤食物都係最基本嘅雞全翼、豬牛扒、獅子狗卷、紅腸及魚蛋等，全部即叫即做。燒烤場就環境超正，除荷花池畔有蓋燒烤場，連山邊、大草坪位置都有，感覺變化得多。
拉頭馬 明星馬
「元朗大棠荔枝山莊」竟然隱藏一間「荔枝園騎術學校」，負責人話：「『石磨藍』相信會較多人認識，香港在役出戰32場，贏過四場頭馬，啱啱仲幫手拍過《洪武三十二》。」呢度有「馬術入門半日營」（$90），由基本理念講座、參觀馬房、餵飼馬匹、拖馬、沙圈合照樣樣玩晒。
呢度仲可以玩牛牛車遊山莊，餵鴕鳥、白兔、山羊食甘笋，餵錦鯉食魚糧等等（各需套票一張），價錢唔貴，$60入場費連活動套票三張。Alina：「呢度仲有兔仔同山羊，可以近距離接觸，不過唯一玩唔起嘅，係兩隻用籠養嘅野豬，呢度可以同佢眼望眼，真係好刺激！」
勁猜農作物
答案
1.蓮霧
2.提子
3.荔枝
4.大樹菠蘿
5.油甘子
元朗大棠荔枝山莊（24702201）
地址：元朗十八鄉大棠山道11號