【本報訊】政府力圖活化工廠大廈，結果首先趕絕一班本地藝術家。多間位於觀塘工廈區的藝術工作室半年內先後因加租而宣佈結業，其中樂團表演場地「HiddenAgenda（HA）」，更遭地政總署發信，指其違反工廈使用用途，勒令他們本月底前停止所有與工業無關的商業活動，負責人表明「搵唔番咁平租金，傾唔掂就惟有唔做。」但會長期抗爭，要求政府修例，讓他們保有最後的表演空間。
關注組本周開會討論
HA負責人Kimi表示，明白他們租用工廈搞音樂是違規，但他們無意按條例要求更正，「係制度僵化，我哋係希望政府可以畀番個空間我哋，而唔係我哋捱貴租仲要偷偷摸摸，我哋樓下至少七個單位已經被政府check過。」她指區內近半年加租幅度驚人，其個人工作室由4,100元加租至5,600元，HA業主已暗示未來會加租，若政府不准HA做生意，他們亦無力在其他地區租地方重開。
「政府幫過我哋啲咩？」
工廈藝術家關注組召集人周俊輝表示，本周會聯絡各工廈藝術家開會，討論並跟進HA事件。
但他坦言，就算藝術家沒有違例，在政府現時活化工廈的大方向下，工廈業主圖利加租扼殺藝術空間的問題肯定只會加劇，「好似我哋火炭區，呎租由以往六七蚊升到就嚟十蚊，大家已經退無可退，可能要走到入屯門元朗先生存到，政府嘅文化政策到底幫過我哋啲咩？」