一班高官議員聽見「僭建」兩個字都頭痕，呢頭未搞掂班鄉紳代表拆丁屋，嗰頭又俾記者逐間屋起底，斥責官官相衞。其實眾人天生愛僭建，女嘅以身材為目標，男嘅一樣鍾意幫二奶瘋狂僭建，所講當然係愛驅，頭唇尾翼大包圍左改右加，一樣違法俾人捉，所以改裝知識你要知！
記者：許維雅
攝影：譚盈傑
Model：AnnieG@GME
改裝要得廠方證明
屯門一個百噸簷篷倒塌，再次觸動全城對建築物安全的神經線！大廈僭建要注意，咁汽車嘅僭建物呢？改裝車隨街可見，即使唔會搞到落場版咁誇張，但你總會換過胎軨、加過包圍或換過避震。其實法例上只要對車身曾作出任何改動，都要得到運輸署審批。
若只講車身僭建，即外形上嘅改裝都有唔少規管，據運輸署回覆，汽車改裝必須符合道路交通（車輛構造及保養）規例（第374A章）、2001年空氣污染管制（車輛設計標準）（排放）規例、道路交通條例（第374章）及噪音管制（汽車）規例（第400I章）。仲要留意新車出牌後六個月內不得改裝，否則運輸署有權追回配件價格嘅汽車首次登記稅。
配件有驗證更安全
基本上唔少人買完車才改裝，據行內人士講，未見過有人將車改裝後主動畀運輸署檢驗，而到六年驗車時，只會檢查車胎、制動系統等安全問題，所以個個都只會博唔俾警察捉到就無事。不過講到尾，法例嚴謹嘅最終目的都係為大家安全着想，萬一遇上意外，唔合規格嘅配件好易插入人哋部車造成更大傷亡。
因此，揀選有安全驗證嘅配件、搵信譽良好嘅改裝公司安裝、做足手續，就可以揸得更安心。好多歐洲名廠配件都會有不同國家嘅認證，例如比利時CARACTERE、德國HAMANN及KW都會有德國TUV證書、意大利RAGAZZON就有ECCONFORMITYSTATEMENT（簡稱CE）證書。大部份有安全認證配件都以塑膠料為主，較符合撞擊測試標準。
審批三大戒條
要得運輸署嘅改裝審批，需製造商或代理商許可證明、所更換及改動部份圖則及車輛登記文件副本。至於外形改動嘅標準，大致可分為以下三大類：
1.加裝配件不可太低 或比原裝車身過闊
換避震Low低車身、頭唇尾擾流有咁貼地得咁貼地，就好易與地面磨擦令組件飛脫造成危險，包圍組件尺碼不可太長突出車身。
2.胎軨不可闊過沙板
輪胎尺碼須適合車輛負重量及速度，胎軨不可太大凸出沙板或接觸到車身任何部份，而更換胎軨後不可令速度計有超過±10%誤差。
3.死氣喉發出聲響不可過大
好多車主都愛更換較粗或雙出死氣喉，夠型夠響又可增強性能，不過大家要留意死氣喉不可太嘈製造噪音，亦不可伸出車身以外，更要小心會否影響廢氣排放水平。
認證書基本規格
1.配件所符合的車款。
2.配件產品名稱、號碼及型號。
3.有相或有圖展示配件樣貌。
4.廠方名稱及驗證機構簽名。
5.配件詳盡資料包括安裝方法等。
落場蓮花出到牌
香港改裝法例嚴苛，更有時被人認為有啲含糊，同一款車會出現有啲出到牌、有啲出唔到牌嘅情況，不過唔好睇死運輸署乜都唔畀，只要你有足夠安全證明，都有成功例子。好似有行家就喺04年幫一部LotusExigeCupCar出到牌，進口負責人起初以為唔可以有防滾架，唔可以有絞牙避震及四點式安全帶，但最後憑原廠證書及驗車報告成功過關！
查詢：21420005（TWAutosport）