iProA風暴印證咗五毛黨早已橫行香江。所謂五毛，可以叫佢哋做「網絡評論員」，即係受僱做槍手，專喺網上討論區發帖子、做打手，製造虛假輿論。仲唔明？可以參考吓艾未未今年3月22日（被失蹤前），親自訪問一名內地五毛嘅精采紀錄。由於艾未未已被非法拘留，呢篇訪問稿係由艾未未助手5月5日代佢發出。
網絡打手按月出糧
艾未未訪問咗26歲嘅「輿論引導員」W，佢自稱喺上海，大學新聞系畢業，做過電視台，從事傳媒行業約四至五年。W成日上網，因想賺外快，約一年前經朋友介紹，加入五毛行列。佢覺得想做呢行呢，基本係要有一定文字基礎，因為要不停咁寫。W每朝約9點就會收到email，話佢知今日要評論邊啲新聞，然後佢就會去各討論區發表指定意見，例如早排福島核電事故搞到全城盲搶鹽，W嘅工作就係要去各大討論區叫大家「不傳謠，不信謠」。
傳聞呢類網絡打手每發一帖可收五毛，因而得名五毛黨。W就話報酬其實唔係每條評論五毛，但佢哋按月、按量出糧，基本上都係每100條評論收50蚊。好似佢咁做五毛，每個月可賺五、六百蚊，有啲人可以賺到幾千蚊都得。