家乜都話要3D，做蛋糕甜品都唔例外，嚟緊父親節，不如跟Denice學定做個3D立體蛋糕送畀爹哋，比起買恤衫、公事包、卡片盒等禮物，更有心思！
記者：趙珮倩
攝影：王文忠
V壹網：http://www.vdonext.com/index.php?fuseaction=Features.Archive&channel_id=575603&program_id=1937136
睇片即上
留言電郵：mailto:[email protected]
今日煮腦
DeniceWai（6Senses創辦人）
自小向任職廚師的爸爸偷師，嚐過各國美食並融入個人的烹調風格中，由中菜到意大利菜都是拿手菜。
煮題 食落肚父親節甜在心禮物
有料到
糖膏 做公仔裝飾
由製糖過程中經結晶工序後變成的，多用以搓成不同形狀的圖案或公仔作裝飾用。
無鹽牛油 鬆脆曲奇
又叫淡牛油，做曲奇餅一定要用無鹽牛油，焗出來的曲奇才夠鬆脆。
白朱古力 坐熱更滑
不含可可粉，只有可可油及牛奶，所以呈白色。而溶朱古力時不能直接落煲煮溶，最好坐熱水拌溶，出來效果會更滑溜。
呍呢拿油 過量會苦
做曲奇時加入呍呢拿油可增加香味，但切勿下過量，否則會有苦澀味。
糖霜 甜品裝飾
又名糖粉，是非常微細的糖粒混合玉米澱粉而成，常用於甜品外層作裝飾用。
淡忌廉 35%乳脂含量
乳脂含量約35%，可打拂至兩倍大體積，可加糖一起打拂，用來代替甜忌廉做蛋糕裝備。
3D恤衫蛋糕
親手做的3D恤衫蛋糕，睇得又食得，款式仲可隨意設計，爸爸一定鍾意。
材料
麪粉210克、糖116克、發粉3/4茶匙、淡忌廉70毫升、雞蛋3隻、無鹽牛油（已溶）105毫升、糖膏150克
牛油糖漿：無鹽牛油（放軟）220克、糖霜180克、牛奶2湯匙、食物色素（粉紅、啡、藍）各少許
做法
1. 將麪粉、糖、發粉一同過篩，加入淡忌廉，逐一下蛋以低速打勻成麪漿。
2. 在長形蛋糕盤塗上溶牛油，鋪上牛油紙，再掃上已溶牛油，倒入麪漿掃平。
3. 放入預熱至180℃焗爐，焗大約50-60分鐘，取出待凉，切平蛋糕面備用。
4.做牛油糖漿，將無鹽牛油、糖霜、牛奶打勻，開成兩份，分別加入粉紅及啡色食物色素拌勻備用。
5.將3/4份糖膏加入藍色食物色素搓至顏色均勻後，取適量碾平，切出領呔形狀，壓呔紋，唧上啡色糖漿。
6.蛋糕塗上粉紅色糖漿，掃平，放上用餘下糖膏做的衫領，再放領呔，可隨意設計款式及唧上花紋，即成。
貼士
想食得健康些，可改用相同份量橄欖油取代已溶無鹽牛油。
父親節卡曲奇
節日送卡，既不環保，收卡人收到後好多時都不知放了哪裏，不如做一張食得落肚的卡，有得食有得寫，一舉兩得。
材料
牛油（室溫放軟）130克、糖108克、蛋1隻、檸檬茸1湯匙、呍呢拿油/水1茶匙、麪粉316克、鹽1/4茶匙、糖霜500克、固體植物油160克、奶3湯匙、食物色素（橙、藍、黃）各少許
做法
1. 牛油加糖、蛋、檸檬茸、呍呢拿油打勻，逐漸加入麪粉、鹽、水繼續打勻至成麪糰。
2. 將麪糰略按扁，用保鮮紙包實，放雪櫃雪2小時至硬身，取出將麪糰碾成1/8吋厚度，切齊四邊，再切成2.5吋×6吋長方形。
3. 將麪糰放在已鋪上牛油紙的焗盤上，放入預熱至175℃焗爐，焗18分鐘，取出待凉。
4. 固體植物油略打散，分幾次加入糖霜，繼續打勻至混合，逐少加入奶打至滑身狀態，分三份，加入食物色素，分別放入唧袋備用。
5. 用糖霜混合物在曲奇面寫上HappyFather'sDay，另一邊隨意畫上圖案，砌成打開的卡形即可。
爸爸的名片（白朱古力糖）
市面的朱古力糖偏甜，但自己做的話可加合桃碎和忌廉芝士，減少甜膩感，口感亦相當豐富。
材料
忌廉芝士225克、糖霜500克、呍呢拿油11/2茶匙、白朱古力372克、合桃碎60克、黑朱古力（已溶）100克
做法
1. 白朱古力切碎放碗中，熱水倒入大碗，放上白朱古力隔熱水坐溶。
2. 將忌廉芝士、糖霜、呍呢拿油倒入碗內打勻，加入合桃碎及白朱古力再次打勻。
3. 將白朱古力混合物倒入已鋪上錫紙的焗盤內掃平，放入雪櫃雪1小時待凝固。
4. 白朱古力糖倒出，切齊四邊，再切成3吋×1.5吋長方形。
5. 用黑朱古力漿隨意寫上心意字句，又或者畫公仔便可。
煲呔雪糕蛋糕
煲呔雪糕蛋糕，其實是朱古力蛋糕夾呍呢拿雪糕一齊食，味道Perfect！
材料
牛油（室溫放軟）/麪粉各80克、糖120克、蛋1隻、呍呢拿油1茶匙、鹽半茶匙、谷古粉22克、呍呢拿雪糕適量、已溶牛油少許
做法
1. 碗內加入牛油、糖、蛋、呍呢拿油、鹽打勻，加入麪粉、谷古粉繼續打勻成麪糊。
2. 長形焗盤塗上少許溶牛油，鋪上牛油紙，再塗上少許溶牛油，倒入麪糊，掃平。
3. 將焗盤放入預熱至175℃焗爐，焗10-12分鐘，待凉後取出，將蛋糕橫切半。
4. 將呍呢拿雪糕塗在一邊蛋糕上，然後蓋上另一半蛋糕，包上保鮮紙，放入冰格雪2小時。
5. 將蛋糕取出，一開二份，再切成煲呔形狀即成。
貼士
如家中無焗爐，可用現成的雪藏蛋糕代替，效果差不多。