早排先至報道，「紅魔鬼」曼聯嘅領隊費格遜只要伸出「魔爪」，瞄準年輕球員，基本上都飛唔出佢嘅手指罅，不過，今次費Sir喺羅致布力般嘅年輕後衞菲爾鍾斯，就可能遇上對手喇；因為據報布力般想吊高嚟賣之餘，利物浦話講到明會出價2,200萬鎊（約2.8億港元）羅致呢名英格蘭小國腳㖭！
布力般求價高者得
菲爾鍾斯喺上周四以1,650萬鎊由布力般過檔曼聯，幾成事實，連體測都通過埋，點知，據《星期日郵報》報道，布力般嘅印度班主拉奧家族就好唔滿意點解鍾斯同球會合約中列明嘅1,650萬鎊買斷費會外洩；而上周六曼聯代表喺印度同布力般代表嘅洽談中，據報曼聯方面亦表現得好傲慢，結果會面之後，布力般會長德塞就話要全力留住菲爾鍾斯，就算要賣走佢，都係價高者得，佢仲話布力般已尋求咗法律意見，並唔係一定要將鍾斯賣畀第一隊出到買斷費嘅球隊，但亦有消息話曼聯同意將轉會費加碼至2,000萬鎊。
紅軍叠水8,000萬鎊增兵
喺呢個時候，早前已斥資2,000萬鎊買咗有「新林柏特」之稱嘅佐敦軒達臣嘅利物浦，見機不可失，即刻話會出價以2,200萬鎊，將菲爾鍾斯搶到手。紅軍自從由名宿杜格利殊領軍之後，表現穩步上揚，難怪全隊上下都雄心萬丈，而紅軍嘅足球總監高莫尼話：「我哋今個夏天有8,000萬鎊擴軍，而佐敦軒達臣只係我哋第一個簽得嘅球員啫！我哋要嘅條件好簡單，只要係英格蘭或者英國球員，又喺英超證明過自己就得。」咦？乜咁似講緊菲爾鍾斯嘅？
其實唔單止菲爾鍾斯，曼聯另一個羅致目標翼鋒艾舒利楊格，亦遲遲未落實以2,000萬鎊由維拉過檔嘅交易，據聞係同佢嘅周薪要求有關，話楊格想要13萬鎊周薪；而幾經周旋，紅魔都同意咗呢個數。計我求大俠話，如果曼聯兩大收購目標都唔盡快落實到，相信目前喺法國南部度緊假嘅費Sir，要cut短假期返嚟坐鎮都似。