華華認識嘅富二代中，數最勤力、最鍾意搵錢，「舖王」鄧成波孻仔鄧耀昇（Stan）應入三甲。
Stan自細就陪爸爸睇舖巡舖，早排佢開咗人生第一檔生意「拉斐特」婚禮統籌。咁啱早前證婚中心「奇妙姻典」突然結業，Stan就無條件協助300對苦主準新人完成婚禮，藉此響朵。
婚前講座8堂收一嚿水
上星期婚紗展，「拉斐特」都有擺攤位，華華見到呢位億萬太子爺親自睇檔，仲撞到波叔探班。阿Stan話，呢次擺婚紗展收穫唔錯，一來接到唔少生意，二來好多行家見到佢哋喺油麻地嘅總部咁有氣勢，不停走埋去同佢哋傾合作！
打開門口做生意，秒秒都係錢，為咗令油麻地總部物盡其用，Stan決定喺晚上冇人行禮嘅時段，整番個《婚前講座》，8堂收一嚿水。
波叔話，呢個仔做嘢一向認真，同佢一樣鍾意賺錢，佢希望「拉斐特」快啲上軌道，咁個仔就可以快啲回巢幫佢手，因為稍後佢會推出5幢酒店過千個房。呢啲咪叫虎父無犬子囉！