僭建風暴好戲連場，要數當中聲大夾惡，除咗一班揚言不惜流血、要上街、革命保僭建嘅新界鄉紳，港島區嘅代表就非大班鄭經翰莫屬。此君喺山頂種植道嘅豪宅被揭僭建足成層，接清拆令仲發難渣話要組「僭建大聯盟」爭特赦。「僭建班」唔單止兇屋宇署，近日更遷怒於寫文寸佢「為何死也要撐僭建」嘅港台節目主持人、《信報》專欄作家曾志豪。
變身讀者 快速回應
事緣小豪子上周五喺《信報》副刊《豪鬼夜行》寫咗篇「僭建照妖鏡」，對於大班話「全港兩個人當中，可能都有一個人涉及有僭建物，咁點解種植道要先拆？」小豪子話僭建班呢番言論等於「有人隨街吐痰，執法人員上前票控，吐痰者回應一句：『大班話齋，全港可能每兩個就有一個隨地吐痰，點解要捉我先？』」
點知小豪子篇文一出，僭建班怒不可遏，等唔切下周五喺自己地盤《大班人語》回應，第二日即刻喺《信報》讀者之聲，以「讀者」身份，寫咗篇《曾志豪比喻不倫》還拖。僭建班一開波以近乎爆料口脗，話睇到小豪子篇文「令我想起當天你來向我求職、一臉好想成為名嘴的神情」、「雖然我十分之不齒你在梁思浩事件上賣友求榮的嘴臉，但仍抱着『人在做，天在看』的態度，對你疑中留情」。
撬人失敗 反轉豬肚
僭建班「筆辱」小豪子，講到人哋曾向佢「求職」，但有知情人士睇到呢段「內幕」搖頭苦笑。對於僭建班話有人「一臉好想成為名嘴」，知情人士反駁話當日有人為咗撬人過檔，出盡三寸不爛之舌，用埋周星馳喺電影《功夫》裏面細路嘅對白，又話要搵接班人云云，想人落叠。不過人哋冇答應，咁咪反轉豬肚囉。
僭建班還拖嘅文章，最精警係結尾幾句，話小豪子「以你的年資，能在《信報》專欄高手林中站穩陣腳，實在是個十分之難得的機會……切勿自毀長城」。有網民睇到都覺巧驚驚，覺得係咪想叫人以後小心啲講嘢。
mailto:[email protected]