田少田北俊早前去咗歐洲，睇完賽車再視察新遊艇，最後去咗美國哈佛醫學院，聽吓專家醫生意見。
早前田少招待國家旅遊局官員去自己遊艇遊維港時遇上大風浪，撞親個頭事小，有輕微腦水腫事大，事關視覺神經受咗影響，至今睇嘢仲有少少叠影。
為咗想睇嘢清晰啲，田少向美國專家打探過，但結論都係一個，要等隻眼喺六個月內自然好。
當然，如果六個月後都冇乜好轉，田少都可以選擇做手術，佢都預告如果真係要做手術嘅話，佢都飛去美國做，唔係貪人名氣好，而係工多藝熟，個個月都有做類同手術。正如佢早年割膽石，揀瑪麗醫院而棄養和，無非覺得瑪麗啲醫生日日至少割一隻膽，應該比較穩陣。