思捷（330）呢間公司真係福地，高層喺嗰度打完工出嚟，即刻可以退休嘆世界。華華近日收到有關帶領思捷走向全盛「黃金十年」嘅「鐵三角」組合──邢李㷧、高漢思（HeinzKornalik）、潘祖明，鬆人之後最新動向，真係聽到華華既羨慕又妒忌！
今年2月11日先正式退任嘅前主席高漢思，就算思捷業績倒退，佢照收近億花紅。據講，佢開完最後一次董事會之後，喺幾個月前即刻飛咗去地中海，日日揸隻幾十呎長私家遊艇出海。高漢思係德國人，以前同華華講過，最享受陽光同海風，退休後一定要日日約美女去食飯。嘩，呢啲hea嘅生活，華華得個「恨」字！
業績倒退 花紅照袋
08年思捷神話破滅前已經鬆人嘅前副主席兼財務總裁潘祖明（John），一直都冇佢另謀高就嘅消息。有老友話，其實阿John早喺55歲未到已經半退休收山，喺思捷搵埋咁多個億，夠晒皮咁話。據講，佢家有間私人投資公司，得閒炒吓股，平日喺會計師公會做吓公職。最近動向係，3月入咗積金局做非執行董事。
至於最早「起身」嘅老闆邢李㷧，咁多年淨係賣股就套現超過200億，更加唔使撈！聞說佢除咗喺海南搞吓投資同慈善工作，亦會出現喺馬場跑吓馬仔咁。老友話，佢同仲喺思捷做獨立非執董嘅鄭明訓、柯清輝老友鬼鬼，間唔中都會出嚟飲吓茶、打吓golf，唔知邢李㷧仲有冇閒情，關心吓思捷家做成點呢呵？
李華華
mailto:[email protected]