今年XBOX一如所料，並無新機種推出。但除咗有海量遊戲支持外，微軟亦為XBOX360提供升級系統，更全面用盡Kinect嘅體感功能，只要有把聲就可以控制主角，真係連手掣都慳番！
記者、攝影：王震遠
體驗未來科技
微軟未有消息推出XBOX360後繼機，今年E囗所發佈的內容大多跟Kinect有關，推出多款支援Kinect平台的遊戲，包括《TigerWoods》、《FIFA12》、《MassEffect3》、《StarWars》等大作，但講到最吸引，相信都係《TomClancy'sGhostReconFutureSoldier》同《Kinect:DisneylandAdventures》。
老牌遊戲《GhostRecon》的射擊玩法同前作大同小異，今次支援Kinect，可以透過人體追蹤同語音辨識技術，利用指令去控制角色行動；另外新加入的特殊模式Gunsmith，玩家可以自己改槍，不過並非手掣控制，現場所見官方示範，只要張開雙手，槍械就會自動解體，左撥右撥時零件識得飛嚟飛去，十足十IronMan上身，真正體驗到未來世界嘅高科技。
大戰鐵鈎船長 攬白雪公主
Kinect嘅出現令XBOX多咗唔少女性Fans，即將推出嘅《Kinect:DisneylandAdventures》，相信大人細路都鍾意。呢款遊戲用迪士尼做主題，玩家會進入立體嘅迪士尼樂園世界，可以喺樂園內隨意走動，有大把迪士尼人物主動招呼你之餘，仲可以同米奇擊掌，或者同白雪公主擁抱。不過喺虛擬嘅迪士尼世界行動未係最特別，現實中嘅機動遊戲會喺遊戲中消失，由MiniGame取代，暫時公佈的有小飛俠大戰鐵鈎船長，玩家可以擺出飛行動作，喺空中飛翔，或者置身水晶球內，雙手不斷撥動，主角就會向前滾動。
XBOX好戲派
微軟宣佈同YouTube合作，系統將支援YouTube影片播放，成為金會員就可以享用。另一大突破是直播電視、音樂等娛樂節目將會入主XB360，新加入的HuluPlus提供大量如FOX、NBC、ABC等高清電視節目，而Netflix及Zune將提供過千套電視劇和電影。此外，微軟宣佈每場收費的直播UFC（UltimateFightingChampionship）節目，而ESPN亦加盟到XBOXLive，雖然暫未宣佈有否地區限制，但依然值得期待。
現場花絮
同場加映：
SONY新3D芒 對戰二合一
呢部命名3DDisplay嘅24吋高清芒，連埋3D眼鏡同遊戲《Resistance3》一同發售。除支援高清同3D顯示，仲特別推出雙人模式，即係兩個玩家同時望住螢幕，背後實際有兩個畫面輸出，只要佩戴不同眼鏡就會見到唔同畫面，最適合打機對戰。
困獸鬥Leon唔做隊友
Capcom新作《ResidentEvil:OperationRaccoonCity》可選用偵察兵或武裝分子等，版面上充滿喪屍和生化怪物，仲可以殺死Leon。現場試玩過，感覺有亂鬥Feel，以RaccoonCity做背景，鍾意射擊Game嘅一定啱玩。
隨地開波FIFA12推出iPad版
《FIFA12》的全新內容包括防守戰術、精準盤球和球員撞擊等。另外，球員撞擊系統會加入更多推撞動作，更貼近真實。不過最令人期待都係將會推出iPad版，特別可以用iPhone連接成手掣，iPad則成為主畫面，以後周街都可以開波。
經典重裝 高清版蛇叔
Konami公佈今年11月將會推出《MetalGearSolidHDCollection》，暫定推出PS3及XB版本，將舊作1至3集重新製作，畫面質素大幅度提升，蛇叔都青靚白淨咗，就連聲底都靚埋。
