上星期日賽馬有港大校友會挑戰盃，港大定下賽馬會廂房請客，一眾名人校友齊齊捧場，不少傳媒朋友應邀出席，在沙圈外見到港大籌款/校友主管徐大姐，打個招呼，左丁山與佢開玩笑：「點解今年唔請我？」佢話：「怕咗你呀！」怕乜呀，港大會怕人嘅咩！
沙圈內見到馬場稀客徐立之校長與周肇平副校長，周副校長陪霍家孫兒霍啟剛進場，次日「蘋果」有兩人相片，但「蘋果」記者大概只識霍公子，唔知周副校長係邊個。左丁山點解到沙圈呢？校友會主席陳志新隻「中華寶寶」係沙田千八米專家，上次輸得唔抵，沿途受阻，好唔夠運，今次排十四檔仲好，起碼可以一條心，出閘就跟住後面有遮擋，入直路抽出外面狂衝就有資格贏，或者因為抽十四檔之故，賠率有九倍，益晒我地班捧場客，馬主陳便贏到開巷，獨贏、連贏、位置Q、三重彩、四連環，全部中晒。問佢點解咁叻買到三重彩，佢話：「以中華寶寶做膽，拖七號飛騰好正常啫，又見到新亞同屆同學徐立之校長，與佢握手，佢話捧一號威騰駒馬主文肇偉場，於是靈機一觸，拖埋一號，咁就得咗！」唉，左丁山都係感光慢，掛住同徐立之傾偈，都唔記得咗佢就係與威騰駒馬主站在一起。
大學盃賽，一季有兩次，不分先後，就係中大校友會聯會盃與港大校友會挑戰盃，港大校友馬主贏過中大校友聯會盃未，冇印象，港大有數之不盡咁多校友馬主，相信有嘅。中大新亞書院校友賽馬團體就贏過港大校友會挑戰盃，隻馬就係「心之靈」，可惜之後新亞賽馬團體之馬運麻麻，「心之靈」跛腳，人道毀滅，「上下四方」流鼻血兩次，退役；最新之「奮進」本來有啲質素，但四歲馬就患上骨刺，手術失敗，被逼退役，今次又參與抽籤嘞，抽唔到，要等來年。養馬點都要講運，一班傳媒老友如蕭老總，趙老總，焦副總有份嘅馬「傳媒先鋒」，一出賽就扭傷腰骨，唯有退役了事，不幸中之幸就係馬會按條例准換馬，新馬下季到港。