$88,000水晶香水贈興　黑豹香噴噴

$88,000水晶香水贈興　黑豹香噴噴

積架早前將XF加入BlackPack配件，銷量相當好，今次連旗艦級XKR都玩埋，同場仲加映香水名牌Lalique贈興，以推出Crossover香水，望住支9萬蚊香水，男人大條道理話：「百幾萬買XKR邊算貴？」

記者：徐影龍
攝影：伍慶泉　
Model：Hidy@GME

磨砂工藝最矜貴

香水同靚車合作「互乘」非首次，不過好似積架同Lalique玩到咁大又真係少見。以磨砂技術聞名嘅Lalique，一個兩呎高水晶人像可叫價超過二百萬，仲貴過架XKR！今次跟積架合作祝賀黑豹XKR誕生，推出限量75支JaguarbyLalique香水，一貫獨特層次感水晶磨砂工藝，躍豹圖案零舍神氣，售價達$88,000，瓶身刻晒限量編號。模特兒凝神屏氣，拎上手心理壓力都幾大，工作完成後，輪到我小心翼翼將「幾皮嘢」拎上手Feel吓，又確係墜手；扭開蓋聞一聞，應該索咗成千蚊入鼻，感覺比飲兩啖82年Lafite更賺！但味道好像很淡？PR在旁冷冷一句：「呢支係貨辦，入面裝清水咋！」

■Lalique磨砂水晶罕夾貴，呢支全球限量75支嘅香水，索價$88,000。

■換上BlackPack套件，白中帶黑嘅XKR更形兇猛。

純白中引發黑豹獸性

玩完女士HighEnd嘢，入番正題，輪到男人們嘅終極夢想—極級戰豹XKR。首度採用超晒班嘅5,000ccV8引擎，再加Supercharged，馬力達到510匹，0-100km/h只需4.8秒，絕對係一隻瘋狂的豹。最特別係代理從英國原廠引入嘅BlackPack改裝套件，包含全套包圍、20吋Kalimnos亮黑色輪圈、亮黑窗框同氣壩位，以及火紅煞車卡鉗等，將純白XKR引出黑豹獸性，路人見到無不舉機拍照。
內櫳則換上獨特Charcoal皮料，走入車廂，舒適豪華感果然不同凡響。單門雙座Coupe格局，但毫不逼狹侷促，駕駛艙林林總總高科技裝置，確實氣派不凡。扭開B&W名牌音響，聽住CharlotteChurch美妙歌聲，再幻想將Lalique香水噴灑喺呢位英國古典小天后身上，情景是多麼浪漫啊！

■座椅鋪設Charcoal高級皮革，縫線及飾板可由車主自由揀選。

■咪睇佢Coupe款就以為好逼狹，尾廂空間絕對係深藏不露。

■低矮車身配20"巨軨，加上全新火紅卡鉗，勁搶眼。

■可選擇配上獨一無二嘅XKR拉花。

■門窗及側鏡亦換上黑框作點綴。

■駕駛艙典雅佈局中，同樣顯露高科技感。