繼加利尼維利後，另一位曼聯「7小福」成員史高斯亦喺8月5日，於奧脫福球場進行告別賽，為在紅魔擔任球員嘅一段漫長日子畫上句號。同「加利佬」相比，史高斯最大面子係得到昔日「曼聯大帝」簡東拿罕有地回歸撐場，莫非「大帝」偏心史高斯？
領宇宙隊出席唔落場
簡東拿出席史高斯退役紀念賽，唔會落場比賽，而係以美國球隊紐約宇宙嘅總監身份領軍降臨奧脫福，屆時將會同昔日恩師費格遜喺球場上切磋領導球隊嘅技倆。對於簡東拿能夠出席史高斯紀念賽，除咗某程度上因為曼聯同宇宙隊嘅主要贊助商屬同一公司，因而造成兩隊交鋒外，「大帝」以往同史高斯嘅並肩作戰歲月亦頗多，而且位置上大家都係進攻為主，昔日喺球場上溝通機會一定多過同「加利佬」，份外熟絡不足為奇。
45歲嘅「簡大帝」喺公佈咗會重返奧脫福後，就公開恭賀史高斯喺曼聯有咁美好嘅日子，亦對於自己以宇宙隊總監身份回到昔日英雄地感到高興。至於史高斯就話，球員生命全部為曼聯作出貢獻，能夠獲安排一場紀念賽，屆時肯定對佢同家人都極大感觸。
其實，出席史高斯紀念賽有份量嘅人物，除咗「簡大帝」外，球王比利亦會以宇宙隊會長身份，成為其中一位座上客。至於好似碧咸、菲臘仔等「7小福」成員會唔會再次亮相奧脫福，就有待公佈。
其實史高斯喺告別賽後，就會展開曼聯生涯新一頁，因為佢已經答應球會負責教練嘅工作；而早前才正式退役嘅「加利佬」，日前就獲得邀請到咗美國芝加哥，出席MLB白襪隊比賽嘅開球儀式，目的係為咗幫曼聯宣傳，為今夏季前美國之旅造勢，似乎佢喺紅魔走嘅路線，同白賴仁笠臣差唔多，當球會大使四處推廣紅魔品牌。