無可否認瑞典紳寶SAAB近年較少人談及，平日出街都唔係成日撞見。上星期日見到二十幾架紳寶車同場，難得一見以為銷聲匿迹的車再次出現，聽着車迷們數盡紳寶無數個第一，力撐其不死精神。
記者：許維雅
攝影：黃子偉
Model：Rika@GME
久違經典現身
車迷會聚會並唔係新鮮事，不過近年感覺較小眾的紳寶都搞車會活動，就令我感到有點意外，今次SAAB香港代理合朗汽車更首次參與舉行，仲事先張揚會有久違的經典紳寶到場。雖然當日太陽猛烈照射，氣溫高達攝氏三十幾度，要我身處於極空曠的白石俱樂部乾燒，實在想死，不過一班紳寶車迷會會員卻依然興奮熱情，還逐一介紹他們的心頭好。
黎明愛驅900Convertible
每次提及紳寶，朋友的第一個反應永遠是呢句：「當年好紅o架！黎明揸嗰架開篷喎！」SAAB900Convertible好似印有黎明嘜頭一樣，關係密不可分，皆因黎明當年擁有一架之餘，紳寶更有份贊助黎明的夏日傾情演唱會。再加上喺《逃學威龍》等多部電影出現過，曝光率極高，成為當年優皮身份的象徵，令它於九十年代紅極一時。
於1986年面世、1994年停產的900Convertible，備有一台16氣閥渦輪增壓引擎，於1991年在某些市場改用fuel-injected2.1公升自然吸氣引擎。由最初想刺激銷量而推出，無諗過大量生產，但其耐用引擎及瀟灑外形令定單不斷，因而創造這部經典開篷車的威水史。
活動當日，有一紅一黑現身，而黑色那部就由SAAB會會長阿華擁有。曾經擁有無數咁多部紳寶的阿華迷戀紳寶的原因：「好多年前需要搵部可靠耐用的腳車做公司車，自此一揸便愛上。」
限量珍藏9-3VIGGEN
這架全球限量2,500架的VIGGEN版，當年屬最高性能款式，由普通版的2公升引擎增至2.3Turbo引擎，將增壓值推高到250匹馬力。VIGGEN源自瑞典國防工業JA-37Viggen戰機的名稱，打正旗號要挑戰車主的駕駛技術，只有棍波無自動波，所有電子輔助配備欠奉，只保留ABS，會唔會難過揸戰機？要問問車主Ricky了！
真係好好揸！呢部係我第一部紳寶車，一年前從英國人手上買回來，所有原裝配備無郁動過，廠方調校得好穩定，十年車依然好出色！
見證歷史9-3Coupe
勇於嘗試係紳寶的風格，亦係車迷鍾情的原因，是首個品牌將渦輪增壓引擎放入五門房車，首個品牌推出半自動波波箱車款。這部9-3Coupe有份見證歷史，它所配置的Sensonic波箱，屬手波波箱卻用電腦控制極力子，免卻踩極力子煩惱，但由於走得太前，波箱未夠成熟，廠方去到98年宣告投降。車主Sam無心插柳於5年前喺劏車場用一萬元執佢返嚟，雖然一揸便愛上，但最後亦要投降換了一個手波波箱。
雖然波箱失敗，但引擎輸出力量勇猛好多，Turbo爆發出的扭力好強，無老態無疲態。
改裝歷代史9000/9-5Aero
外表斯文的紳寶一樣有車迷愛改裝，同場有兩部改裝代表9000及9-5Aero，兩車除副引擎，幾乎乜都改，電腦、死氣喉、胎軨、避震彈弓等，大部份配件出自瑞典品牌BSR。
最多人改的車款係9-5，改電腦最出名，改完可由200匹加至250匹馬力。BSR會長期落場試車，一定唔會過熱，價錢約八千元至一萬元。
最新設計
SAAB9-5Vector2.0T
當日同場的當然唔少得全新設計的SAAB9-5，備有2公升直四雙渦輪增壓引擎的Vector2.0T版都有220匹馬力，而2.8公升V6Turbo的AeroTurboXWD版，馬力更高達300匹，配合六速自動波箱，當然唔會輸畀班老人家啦。上星期去完白石騷Power，今日再走入康樂園鄉村俱樂部舉行試車日。
地點：大埔康樂園鄉村俱樂部
查詢：27608668