通天酒業（389）跌到落上市以嚟低位，PE得番單位數，要實。通天酒業主打祖國葡萄酒產銷及葡萄供應，單睇07年（12月年結）到2010年純利，每年都係有雙位數增長。此無他，祖國同胞富起來，講究享受，而據有關機構估計，祖國已經成為全球葡萄酒消費量增幅最高嘅國家。到咗明年，兼有望躋身全球第七大葡萄酒消費國，總銷量上到1.2億瓶，有呢個需求支持，通天酒業長賺長有。又集團上個星期跌到落上市以嚟低位，往績PE得單位數，又係係咁意估計集團2011年度純利增長20%咁大把，純利上到近2.5億銀人仔，連攤薄效應計，預期PE都係得8.5倍。博通天酒業升40%到1.80元，預期PE都係得12倍，仍然好抵買。
北京發展博升兩成
北京發展（154）喺5月公佈出售「一卡通」業務畀控股公司北京控股（392），估計獲得收益1.1億銀，本年度業績已經有呢壇收益墊底。再講，隨住集團出售核心業務，加埋阿媽背景強勁，北京發展有無新搞作，值得憧憬。Beforethat，北京發展現價1.12元，又係另一隻跌到殘嘅股仔，冷吼博升20%到1.34元，PB1.4倍，仲係可以接受。
錢雋