曾經受譚詠麟力捧嘅前男子組合E-Kids成員Tommy阮民安，06年喺澳門豪賭輸清光後向大耳窿借錢，搞到俾大漢押返香港還債。事後Tommy口口聲聲話會改過，點知噚日又有讀者同馮仁昭爆料，話最近Tommy向財務公司借錢唔還，搞到俾財務公司狂追數。
欠款欲轉林雪名下
讀者話Tommy舊年11月以出唱片為名同財務公司借咗10萬蚊，分多期攤還，點知Tommy還咗第一期數之後開始甩數，財務公司狂追之下，Tommy只係還咗利息，後來Tommy同財務公司提出，想將借錢人個名改為佢老友林雪，仲話林雪親自打過電話去財務公司表示同意轉名，但俾財務公司拒絕。到最近個幾月，Tommy唔單止乜都唔還，而且仲索性唔聽電話避債。
噚日馮仁昭打電話向Tommy求證，佢口窒窒否認話：「有啲咁嘅事？我諗我冇聽過。完全唔知呢啲事。又嚟呢啲咁嘅新聞？完全冇冇冇冇冇（口窒窒）諗，係咪誤會咋？我冇做過，係咪啲人整蠱咋？」