新制度規定進行工程的人士須申領註冊小型工程承建商牌照，未取得牌照的工程公司可暫時持有有效期兩年的臨時牌執業，而以個體戶形式執業的裝修工人，則須完成指定課程並申請註冊才可接工程。惟業界指申請表極難填，有大學資歷的裝修公司老闆姚先生坦言：「見到份表格都投晒降。」
核對表格等半年
該份表格連填寫須知共44頁，須填寫及提交的資料及文件多不勝數，如核數師報告、公司組織圖、曾做工程證明等，最令人頭痛的部份是填寫工程經驗，「攞牌要靠以前嘅工作經驗攞分，例如註冊做拆招牌，屋宇署細分咗好多類，填表人根本唔知自己做開嘅屬邊類，睇完註解都唔明」。此外，表格不容許寫簡體字，要以學術名詞填寫，「行內術語例如『裝窗』、『打地台』唔可以寫，得小學程度嘅裝修師傅申請個人牌，真係俾佢玩死」。
雖然屋宇署提供「對表」服務，由職員為申請人核對資料及提供指導，惟預約需時3至6個月。記者曾到屋宇署位於旺角工業貿易署內的小型工程承建商註冊資訊中心了解，即見一名中年漢預約後不獲接見，怒氣冲冲地說：「究竟有冇人同我對表？你哋叫我由1月等到3月，3月又話冇人手，家等到6月，究竟想點？」職員坦言人手不足要求再預約。
經一番擾攘終有職員為他對表，有多項錯處須即時修改，需時20多分鐘才完成核對，他氣憤地說：「唔嘈都唔幫我對，交申請表都搞半年，政府呢個政策真係好失敗！」
《蘋果》記者