坦言「我哋一向都性格不合」，現年25歲的盧凱彤（Ellen），與拍檔林二汶組成at17，經歷了9年樂壇生涯，卻換來這一句話。at17至今已分開發展一年多，各自在事業上拼搏，Ellen深信無論情侶、組合都有分開的時候，但二人也必有復合的一天。
盧凱彤在15歲時，與林二汶組成at17，每次演出必有影皆雙，分開發展這一年多，Ellen忙為陳奕迅、容祖兒的演唱會做樂手外，籌備多時的首張個人專輯《掀起》會在本月中面世。
「我哋好愛大家」
分開初期，Ellen坦言感到不慣，尤其之前一個人飛往台灣宣傳，她說：「舞台上冇咗一個人，舞台下又冇咗一team人，係幾寂寞，但去到台灣做咗好多校園騷，啲刺激感就返晒嚟。」Ellen表示將來一定會與二汶復合，叫大家不用擔心，她說：「每個組合都會面對自己成長階段，我哋選擇喺未嗌交之前，一定要嘗試獨立發展。我哋一向性格不合，佢個人好快好外向，我就好慢好內向，但我哋私下感情有幾好，大家係冇法想像，我覺得我哋真係好愛大家先分開發展。」
Ellen坦言以往意見不合，大家也有冷戰時候，她說：「我哋嗌交從來唔會鬧出面，只會唔講嘢，冷戰一日囉，真係一啲都唔奇怪，任何情侶、組合都會。」曾經有說二汶眼紅Ellen能為紅星做樂手，賺錢又比自己多，Ellen即笑說：「一啲都冇，好搞笑，報道仲話我哋決裂，佢賺得多過我啦，點會眼紅，我哋恨不得大家過得越嚟越好。」
新歌與恩師合唱
明年是at17出道十周年日子，一直有指二人會舉行紀念演唱會，Ellen說：「一定會一齊再做，只係未有確實日子，佢家忙緊舞台劇，我又忙緊專輯，但我哋有共識嘅。」Ellen表示很重視這張專輯，最開心是親自邀請到恩師黃耀明合唱一曲。
採訪、攝影：溫敏芝
場地提供：中環ifc
造型：TangLai