噚日林峯喺W酒店為佢喺七月舉行嘅「LightUpMyLive林峯演唱會2011」開記招，一到場佢先chok住樣邊跳舞邊唱快歌《熱能放送》，台下嘅Mani睇到勁high。
之後樂易玲上台講祝福語，佢爆料話林峯記招前一晚扭計：「佢噚晚dum晒地，因為佢凌晨兩點半先收廠，今朝五點就要開外景，只得中間幾個鐘排今日隻舞，不過你（指林峯）都跳得幾好！」林峯聽完再撒嬌：「唔好以為完我，下次得番個半鐘畀我排！」大會又宣佈林峯會搞世界巡迴演唱，可能會去英國、悉尼等地開騷。
林峯話今次個唱嘅形象會比之前man：「今年工作同人生經歷咗好多，想畀大家睇到成長嘅林峯，今次會唱好多快歌，會跳裂個台！」林峯話之前怕慾照事件會影響個唱嘅門票銷量，但經自己分析後，就覺得應該做番應該做嘅嘢。
畀飛陳嘉桓
林峯開騷期間，潘霜霜都會嚟香港宣傳寫真，問林峯怕唔怕霜霜嚟睇騷？佢只係話歡迎所有真心入場嚟睇嘅人。至於緋聞女友陳嘉桓，林峯話預咗飛畀工作上嘅朋友，仲唔介意畀飛陳嘉桓。