沙田陳太早上八點到酒樓飲茶，只見一兩位侍應招呼，叫茶要水，侍應雙拳難敵四手，茶客有排等，一位阿婆自己起身去攞茶，點知心急之下，仆在地上，嚇親眾人。陳太叫點心，夥計又話：「要等吓噃，廚房未齊人。」陳太與其他茶客討論此事，有茶客話：「此乃最低工資實施後之怪現象，老闆要計數，早上十一時前唔叫夥計返齊，慳番一啲工時，等到十一點後午飯旺市啦，夥計先至全部報到，一路做到晚上九時後，夥計開始分批放工。」為了應付最低工資，酒樓諗出此辦法控制成本，令到早晨茶客好唔方便。
酒樓如此，無非為了生意上求生存，不受淘汰，正是殺頭生意有人做，蝕本生意無人做，倘若一個行業嘅廠商數目愈來愈少，而且整個行業嘅總收益停滯不前甚至下滑嘅話，即係表示呢個行業好難做，中小企難以生存，索性閂門不幹。教科書出版業就係一個例子，呢行嘅「工業架構」究竟係點呢？雷鼎鳴教授已被委任為一個「學與教資源檢討工作小組」成員，其他委員或者唔識乜嘢叫做市場啫，雷教授實識嘅，為呢個小組其他成員講番一課都得。佢話教科書市場須設機制和守則，大家願意洗耳恭聽，首先希望佢與學生深入研究點解：（一）教科書市場為何萎縮，
書商數目不斷下降；（二）教科書為何要改，Durell嘅數學書為何現在唔適用，係教育局課程發展處嘅問題還是書商問題？要知道，所有教科書都係要緊跟教育局課程嘅；（三）教中文點解要好似教英文，搞九種能力，令到書商要準備好多教材？點解教育局唔准學生背誦範文，書商做多啲教材，如無需要，以應付甚麼「學習差異」，雷教授會估書商肯做？（四）雷教授話要為教科書市場引入競爭，請問一個行業有十幾二十家（從前有四五十家）廠商，算唔算有競爭？招標就等於競爭？如果只有三個投標，競爭算係增加還是減少？前教育局長王永平話要為教科書引
入競爭，現任孫局長在電台話教科書市場有惡性競爭，一啲議員官員又話教科書市場係壟斷？究竟邊個至啱？成個「學與教資源檢討工作小組」，只有雷教授識得研究競爭問題，大家靠晒佢！