食典1:赤柱海夏食薄餅 逼你做西人

食典1:赤柱海夏食薄餅 逼你做西人

今日帶大家到赤柱享受香港第一度暑熱之氣,逛正灘,人寥寥可數,原來好多人都未行下水禮。諗住撐小食亭,嘩,十七大元一罐可樂!嚇到我即刻彈番落赤柱大街,老街坊笑我死心不息想食中餐:「對唔住,你唔會搵到囉。」成個赤柱逼大家做西人食西餐,Fine,反正好味,西人就西人啦。

記者:朱崇德
攝影:陳盛辰、林鈞

鬼佬陀地飯堂

一落車,真正感受到何謂爍石流金,柏油路面蒸起一個扭曲空間,嗰種乾煎感覺,好似身處用+2光圈拍攝嘅墨西哥場景,有一刻我真係問過自己:「係咪嚟錯咗?」行五分鐘,濕晒身撞落赤柱大街,首先吸引我眼球嘅,係藍白色勁強歐陸小屋Feel嘅「PizzaExpress」,對正赤柱卜公碼頭,玻璃窗天花、落地玻璃再配幾個露天座位,好Relax。下午三點過後,陽光已經不能直闖入舖,配強勁海風,輕輕吹散空調,凉凉感覺,好夏日、好自然。
聽赤柱陀地鬼佬介紹,此店可算附近出名西人飯堂,愛佢乜?全Handmade、超Raw,如果去過歐洲留學,對呢間舖應該唔會陌生,1965年英國金漆Pizza店是也,創辦人PeterBoizot為一句:「英國無真正意大利薄餅。」而堅持到今日,我愛死佢個激薄脆餅底,咁先係真正意國風味,餅底稍稍烤焦嘅麪粉香,辣住脷都逼到你塞入嘴,好味,真係好好味。

■有小量露天座位,吹海風一流。

■落地玻璃感覺開揚,睇住海景開餐,正呀。

■鍾意嘅,可以撐上二樓,大露台望得更遠,更自成一角。

■八成客人係西人,話佢鬼佬飯堂一點不假。

■薄餅要夠薄,先可以焗到咁香脆。

茄醬唔使加甜添酸

唔講未必知,薄餅靈魂番茄醬之所以咁惹味,全因傳承咗1965年嘅古方,店子只使用帕爾馬Greci家族農場種植嘅SanMarzano番茄,用呢種番茄製作嘅茄醬味道鮮香,醬身自帶濃厚甜味,好多Pizza舖要幫茄醬加甜添酸,呢度純Natural就得喇。
鬼佬陀地最愛,必數帕爾馬薄餅,薄切意大利火腿呈鮮嫩淺粉紅色,嗰種入口即化感覺,高級酒店試過,估唔到呢度小店一間,都可以品嚐到。心多?我建議試四季薄餅,一個薄餅分成四角,分別有有機蘑菇、辣肉腸、橄欖、酸豆銀魚柳四種唔同口味,入口保證熱辣辣。意式肉丸加蝴蝶粉無錯係香港獨家,但唔夠意大利煙肉沙律咁驚喜,竟然係暖住食,伴碟意式焗小包外脆內軟,夾車厘茄、牛油果、松子仁同青菜,入口勁Fresh。
稍為唔開心嘅係,上年秋冬限定嘅無花果撻已經無賣,好彩新Menu有番個香梨撻,餅底牛油味啱啱好,面頭起焦但又唔算油膩,香梨大切角原味入撻,唔花巧清淡順喉,無咗呢個甜品,成餐飯一定覺得唔夠圓滿,我話嘅。

■帕爾馬薄餅$136

■四季薄餅$126

■意式肉丸蝴蝶粉$103

■意大利煙肉沙律$106

■茄醬由意大利特別訂製,有誠意、有堅持。

■香梨撻$55

(赤柱大街90號/28137363)

兵哥買醉熱點

想感受赤柱最元祖風味,老街坊指我去有逾四十年歷史嘅「THESMUGGLERSINN」,一入呢間赤柱大街上首批開設嘅酒吧,你會覺得佢相當「有錢」──牆身、木柱甚至天花板都貼滿唔同國家嘅銀紙,總廚B哥笑笑口:「都唔只銀紙嘅,身份證、學生證、卡片樣樣都有,有人仲鍾意寫幾句,再釘上去。」
點解有呢個傳統?咁就要講番四十幾年前嘅往事,話說當年赤柱仲有兵營,班鬼頭與阿兵哥晚晚撐場蒲吧,離開香港,鍾意喺銀紙上面簽個名再釘上牆,等下次有朋友再幫襯嗰陣,可以煩吓朋友們搵搵張銀紙釘咗喺邊。先例一開,連不同國籍遊客都玩埋一份,酒吧四壁變成聯合國兼「零度空間」。玩得癲係呢間吧本色,吧枱頭頂仲有鎮店吉祥物──兩條靚女底橫,B哥:「兩個靚鬼妹飲到High晒,即場剝,仲要釘上天花。」懷住無限幻想,問B哥有無相睇,佢指住一幅百人貼紙相,我問:「咁即係邊兩個?」「我當時都飲到貓貓哋,邊記得清楚呀,總之係靚女嚟嘅……」我O嘴,無嘢好講。

■B哥:「兩個留底索鬼妹就喺裏面。」B哥,你玩我咩。

■颱風警告!八號風球撐場者,即送WelcomeDrink一杯。

■鎮店之寶紅黑底橫,聽講只有三年歷史,我信,因為不屬阿婆款式,好Sexy吓。

■我想釘張卡片,不過真係無位,有啲銀紙係乜國家都唔知。

份量足價錢平

周五六晚係熱爆蒲吧時間,想感受何謂逼爆全場、想睇人飛身上枱跳舞,九點過後準時入座啦。酒吧食品份量大價錢平,街頭巷尾出晒名,須知B哥係五星級酒店同大型會所西廚出身,煮菜出名重手,Bangers&Mash係我最愛,巨人級鮮肉腸配紅酒汁,足二人份量,另加鮮打原隻薯仔做薯茸,我出盡力挑戰極限先勉強食得晒。
FishN'PotatoWedges又係正啫,原塊五至六安士重龍脷柳做炸魚已經相當富貴,炸漿超薄夠脆口,又唔會炸到散散收收離晒身,咁先係炸魚柳嘛。SmugglersBugerwPotatoWedges又係大大件,咪睇佢簡單漢堡包一個,五至六安士重肉眼扒一大塊,肉身紋理豐富,入口牛肉味豐腴,絕對純鬼佬Feel。

■FishN'PotatoWedges$75

■Bangers&Mash$78

■SmugglersBugerwPotatoWedges$75

■Nothing$65

■Mimosa$65

(赤柱大街90號A/28138852)