上過賊船未？我啱啱坐過，斷估好多人同我一樣，淨係識搭地鐵、趁逼到連腳趾都望唔到嘅旺角行人專用區，你幾耐無望真過香港呀？賊船叫「張保仔」，仿香港傳統三帆古船設計，全木製、純人手搭建、全香港製造，僅此一艘，估計亦後無來者。
記者：朱崇德
攝影：林栢鈞
Model：Rika@GME
賊船身價一千萬
對於坐艇，相信無人似船長華哥咁有經驗，祖上六代皆為香港漁民，坐船經驗超過四十年，「當中十年，講緊嘅係細路仔年代，我仲揸過大膽船㖭!」華哥笑言：「『張保仔』係艘仿香港特色帆船，珍貴在全人手搭建、全木製、全香港師傅製造，三支帆杆用原條杉木製，主龍骨用同船身等長嘅原木製造，圍欄等裝飾係柚木，五年前造價五百萬，家身價直標千萬。」
下水五年，點解話佢後無來者？華哥表示：「由於環保條例，香港再唔能夠進口原條木材，想再起三帆都無木材。」原來香港造船師傅的工藝技術，冠絕東南亞：「簡單打個比喻，大陸、澳門造嘅木船，如果二手價係十萬，由香港師傅製造嘅同年資同等材質木船，一定實淨好多，開價起碼要貴多一倍。」船身結構仿照五六十年代港式蝦艇，船頭三分一部份似足古帆船，後半部為方便觀光遊覽，所以增建一層開放式包廂，如果百分百仿古的話，一定無家咁嘆囉。想落草做海賊王，唔使擇良辰吉日，每周七日，尖嘴公眾碼頭與中環9號碼頭兩頭遊（下午時段$150，晚上時段$190，各15分鐘），年中無休。另不同日子會加開三至五個小時特長下午航班，逢周一開往香港仔避風塘、逢周三開往長洲、逢周四開往大廟灣，逢周六或日開往赤柱市集，收費由$190至$380不等。
不過講到最動人心魄，必選每晚7:30pm至7:45pm嘅幻彩詠香江時段（$240），華哥話：「曾經有人用兩位$22,000高價，包船玩騎劫式求婚。」暫知有七單成功案例，未有人失過拖，「講你或者唔信，其實好多香港人都未睇過幻彩詠香江。」
中式髮簪做酒籤
咪睇船票好似幾貴，其實一上船即包一杯充滿中國古風嘅Cocktail特飲，當中最有特色嘅係夜明珠，用紹興酒勁撞香檳汽酒，一入口腔酒香揮發，已經令人醉咗幾分，不過更高係以一粒話梅吊味，略略帶酸，易啲入喉，即係易啲醉囉。唔受得咁掯？可以揀鏡中花，用金巴利、菠蘿汁溝梳打水，杯面灑上玫瑰乾花瓣，聞落香香入口甜甜，意境清新。真係要挑戰賊船嘅，可以試杯中夕陽，用Gin酒撞橙酒，再加橙汁及菠蘿汁溝色，入口辣辣開胃消暑氣，不過酒精度數必定高過一般紅白酒，女士們要小心。
飲飲吓，過癮喎，忽然發現Cocktail支酒籤好有中國特色，呢鋪真係海賊遇着木蘭花！原來酒籤由中式髮簪轉化而成。唔使偷偷摸摸喎，經理Eric話：「好多女士都會忍唔住插咗上頭。」其實佢係此船隱藏級小禮物，戴埋落船都無人嘈，真係唔使面紅喎。
辣出孖膶腸
講明先，上得呢艘賊船，唔好寄望有鮑參翅肚之類豪食，食嘅只係小茶飯；所謂齋飲唔飽肚，嚟幾碟佐酒小食會開心好多囉。
好味之最首選滷水花枝，新鮮原隻花枝用淡味滷水汁快速灼熟，有滷水鹹香，保留到花枝獨有鮮味，肉質好Juicy，一客兩隻，有時貨源靚，一隻頂晒一碟，都咪話唔過癮！想食得有香港風味啲，咪錯過N年前戲院門口嘅古董級烤烏賊，魷魚乾勁惹味，最正係辣椒豉油，辣味十足，魷魚燙口豉油辣嘴，食得辣嘅，可以加埋指天椒一齊入口，唔變《東成西就》朝偉哥對孖膶腸，你可以搵我算賬。大路啲，有鮮芋片薄切，焗成脆口薯片狀，幾粒鹽花吊味，簡單送酒已經一流，至於個中式雜錦點心籃，一般蝦餃、燒賣可以話老外至愛，不過我就略嫌唔夠喉，勉強頂得肚咁啦，堅肚餓者可以一食。
逢周六日平價試搭
下下嚿幾兩嚿水遊個船河真係幾肉赤，想平玩？可以周六、日到赤柱玩優惠試坐（成人$80，小童$40），由赤柱公眾碼頭出發，40分鐘慢遊過淺水灣再返轉頭落船，不過酒水唔包，勝在可以玩吓！（航班時間：2:00pm至2:40pm/2:45pm至3:25pm）
張保仔（21168821）
航班及船票查詢： http://www.aqualuna.com.hk/