朗尼植完髮之後回復青春，心情大靚，於是決定同老婆高蓮帶埋囝囝Kai仔（上圖）去佢哋嘅第2個家巴巴多斯度假，高蓮兩個月前先去過呢度，今次再帶埋朗尼同Kai仔，睇嚟朗尼使咗500萬鎊(約6,400萬港元)，上年喺島上起咗間超級豪華度假屋都啱晒高蓮心意。呢間「朗尼別墅」有成6間睡房，仲有個大泳池，加埋個超級無敵大海景，唔怪得之高蓮咁鐘意成日帶埋班WAGs太太團嚟呢度歎世界。
只見朗尼仲帶住頂cap帽保護番個頭，話晒啱啱先使一大筆錢植完髮，梗係驚曬傷。老婆高蓮就更加心情靚絕，大騷惹火身材之餘，仲同Kai仔喺沙灘玩得鬼咁開心（下圖）。聽講佢哋兩公婆趁度假之外，仲會努力「造人」，幫Kai仔追件細佬妹喎！