今日帶大家到赤柱享受香港第一度暑熱之氣，逛正灘，人寥寥可數，原來好多人都未行下水禮。諗住撐小食亭，嘩，十七大元一罐可樂！嚇到我即刻彈番落赤柱大街，老街坊笑我死心不息想食中餐：「對唔住，你唔會搵到囉。」成個赤柱逼大家做西人食西餐，Fine，反正好味，西人就西人啦。
記者：朱崇德
攝影：陳盛辰、林鈞
鬼佬陀地飯堂
一落車，真正感受到何謂爍石流金，柏油路面蒸起一個扭曲空間，嗰種乾煎感覺，好似身處用+2光圈拍攝嘅墨西哥場景，有一刻我真係問過自己：「係咪嚟錯咗？」行五分鐘，濕晒身撞落赤柱大街，首先吸引我眼球嘅，係藍白色勁強歐陸小屋Feel嘅「PizzaExpress」，對正赤柱卜公碼頭，玻璃窗天花、落地玻璃再配幾個露天座位，好Relax。下午三點過後，陽光已經不能直闖入舖，配強勁海風，輕輕吹散空調，凉凉感覺，好夏日、好自然。
聽赤柱陀地鬼佬介紹，此店可算附近出名西人飯堂，愛佢乜？全Handmade、超Raw，如果去過歐洲留學，對呢間舖應該唔會陌生，1965年英國金漆Pizza店是也，創辦人PeterBoizot為一句：「英國無真正意大利薄餅。」而堅持到今日，我愛死佢個激薄脆餅底，咁先係真正意國風味，餅底稍稍烤焦嘅麪粉香，辣住脷都逼到你塞入嘴，好味，真係好好味。
茄醬唔使加甜添酸
唔講未必知，薄餅靈魂番茄醬之所以咁惹味，全因傳承咗1965年嘅古方，店子只使用帕爾馬Greci家族農場種植嘅SanMarzano番茄，用呢種番茄製作嘅茄醬味道鮮香，醬身自帶濃厚甜味，好多Pizza舖要幫茄醬加甜添酸，呢度純Natural就得喇。
鬼佬陀地最愛，必數帕爾馬薄餅，薄切意大利火腿呈鮮嫩淺粉紅色，嗰種入口即化感覺，高級酒店試過，估唔到呢度小店一間，都可以品嚐到。心多？我建議試四季薄餅，一個薄餅分成四角，分別有有機蘑菇、辣肉腸、橄欖、酸豆銀魚柳四種唔同口味，入口保證熱辣辣。意式肉丸加蝴蝶粉無錯係香港獨家，但唔夠意大利煙肉沙律咁驚喜，竟然係暖住食，伴碟意式焗小包外脆內軟，夾車厘茄、牛油果、松子仁同青菜，入口勁Fresh。
稍為唔開心嘅係，上年秋冬限定嘅無花果撻已經無賣，好彩新Menu有番個香梨撻，餅底牛油味啱啱好，面頭起焦但又唔算油膩，香梨大切角原味入撻，唔花巧清淡順喉，無咗呢個甜品，成餐飯一定覺得唔夠圓滿，我話嘅。
（赤柱大街90號/28137363）
兵哥買醉熱點
想感受赤柱最元祖風味，老街坊指我去有逾四十年歷史嘅「THESMUGGLERSINN」，一入呢間赤柱大街上首批開設嘅酒吧，你會覺得佢相當「有錢」──牆身、木柱甚至天花板都貼滿唔同國家嘅銀紙，總廚B哥笑笑口：「都唔只銀紙嘅，身份證、學生證、卡片樣樣都有，有人仲鍾意寫幾句，再釘上去。」
點解有呢個傳統？咁就要講番四十幾年前嘅往事，話說當年赤柱仲有兵營，班鬼頭與阿兵哥晚晚撐場蒲吧，離開香港，鍾意喺銀紙上面簽個名再釘上牆，等下次有朋友再幫襯嗰陣，可以煩吓朋友們搵搵張銀紙釘咗喺邊。先例一開，連不同國籍遊客都玩埋一份，酒吧四壁變成聯合國兼「零度空間」。玩得癲係呢間吧本色，吧枱頭頂仲有鎮店吉祥物──兩條靚女底橫，B哥：「兩個靚鬼妹飲到High晒，即場剝，仲要釘上天花。」懷住無限幻想，問B哥有無相睇，佢指住一幅百人貼紙相，我問：「咁即係邊兩個？」「我當時都飲到貓貓哋，邊記得清楚呀，總之係靚女嚟嘅……」我O嘴，無嘢好講。
份量足價錢平
周五六晚係熱爆蒲吧時間，想感受何謂逼爆全場、想睇人飛身上枱跳舞，九點過後準時入座啦。酒吧食品份量大價錢平，街頭巷尾出晒名，須知B哥係五星級酒店同大型會所西廚出身，煮菜出名重手，Bangers&Mash係我最愛，巨人級鮮肉腸配紅酒汁，足二人份量，另加鮮打原隻薯仔做薯茸，我出盡力挑戰極限先勉強食得晒。
FishN'PotatoWedges又係正啫，原塊五至六安士重龍脷柳做炸魚已經相當富貴，炸漿超薄夠脆口，又唔會炸到散散收收離晒身，咁先係炸魚柳嘛。SmugglersBugerwPotatoWedges又係大大件，咪睇佢簡單漢堡包一個，五至六安士重肉眼扒一大塊，肉身紋理豐富，入口牛肉味豐腴，絕對純鬼佬Feel。
（赤柱大街90號A/28138852）