利物浦屬傳統英超球隊，估唔到都係第一次訪華！佢哋落實下個月13號，喺廣州天河體育館出戰廣東日之泉。球隊高層為隆重其事，派咗董事總經理伊恩艾爾出席記招，佢仲喺席上保證，話謝拉特同古積特班球星全部都會隨隊。想早啲睇紅軍，今日佢哋嘅名宿魯殊（小圖左），就會應贊助商邀請訪港。
對日之泉門票今日發售
中國咁多個城巿，點解利物浦選擇廣州呢，伊恩艾爾解釋：「中國係個好大嘅巿場，加上有唔少利物浦球迷，廣東日之泉亦算好球隊；出於巿場拓展同季前熱身賽嘅考慮下，紅軍最後選擇咗廣州。」賽事落實下月13號晚上8點上演，利物浦會喺廣州天河體育館接受日之泉挑戰，不過日之泉目前只排中甲第3位，同伊恩艾爾所講嘅好球隊，好明顯有啲出入。門票方面由人仔100起，之後200、400、600同800元5種，今日開始發售，球迷想買不妨上網www.proevents.com睇睇。至於紅軍亞洲之旅另一場比賽，安排7月16號喺馬來西亞對當地聯賽選手隊。