證監會行政總裁韋奕禮（圖）今日lastday，正式話別香「缸」，準備返英國金管局，出任消費者及市場營運部營運總監。雖然政府仲未宣佈邊位接替韋奕禮，但市場就傳得好行，話會由一位澳洲幫頂上，聽講最快下星期有公佈。
最快下周公佈新CEO
無論英國人定係澳洲人，證券業人士最希望新任證監行政總裁處事公正，不偏不倚，能夠同業界多啲溝通。業界普遍欣賞韋奕禮過去6年嘅表現，之前有7、8個證券業同上市公司組織，一齊同韋奕禮搞歡送晚宴，華華聽聞，席間大家互相敬酒，盡興3粒鐘，韋奕禮好客氣咁同大家講，過去幾年十分開心，業界對佢好好，佢將會好掛住香港咁話。韋奕禮今日會同傳媒見面，分享咁多年嘅工作感受。