東亞銀行太子爺李民橋上月中在新加坡再婚，迎娶曾任空姐的BonnieKwong，前晚一對新人齊齊手拖手現身Prada配售路演，男的以投資者出席，女的做跟得夫人睇花生騷，十分糖黐豆。盛傳Bonnie已火速造人成功，身穿白色貼身裙的她，親口否認有孕。
意大利品牌Prada將於香港上市，作為主腦兼設計師的MiucciaPrada，與夫婿PatrizioBertelli等管理層前晚在灣仔君悅舉行國際配售宣傳活動，同場加映秋冬花生騷，吸引城中名媛到場，當中有東亞銀行太子爺李民橋、賭王四姨太梁安琪、林建岳前妻謝玲玲和胡郭秀萍等。
貼身裙騷苗條
以投資者身份到場的李民橋，帶同第二任新婚妻子BonnieKwong到場，二人上月10日在新加坡完婚，上月尾在君悅低調補擺喜宴。東亞新抱Bonnie身穿白色V領貼身絹質裙，佩戴珍珠耳環，貴氣中不失清麗。
有傳Bonnie火速有孕，造人成功，她前晚說：「未有。」問李民橋新婚愉快，他即說：「多謝。」並應記者要求企定大方合照，盡顯甜蜜。
四太考慮入飛
身為品牌VVIP的賭王四姨太梁安琪則透露前來看騷，她說：「幫襯咗呢個牌子都成10年，鍾意佢啲恤衫同褲，佢哋都有邀請我去米蘭睇騷。」問到她會否參加配售Prada新股，她即笑說：「我嚟睇騷啫，都有興趣嘅，但要研究吓啲價錢，都係捧朋友場，不過自己細眉細眼，啲大孖沙係基金，人哋嚟香港上市咪即係對香港有信心。」
採訪、攝影：RitaLeung
