【香港先生選舉2011】
噚日12位候選港男喺電視城露面，佢哋聽日會喺TheOne見傳媒，而「失控小虎」、「花樣立基」、「蕭正北」同「四方麪包」都入圍。蕭正北真名蕭家浩（Edmond），佢原來有份演《3D肉蒲團之極樂寶鑑》，喺片尾做新郎，仲用粗口鬧爆聲稱同藍燕有愛無性都可以白頭到老嘅葉山豪。
31歲嘅「失控小虎」叫Hugo，首次面試時默認做紀律部隊，原來係民安隊，正職救生員，佢噚日繼續失控，仲除衫叫工作人員拎住，擺出功夫甫士。「花樣立基」叫Paul，今次收起昔日嘅奔放，只係雙手插袋扮型。
爆鼻爛嘴照入圍
「粗碌臂神」冇得留低，今次見到個20歲嘅「粗碌少年」叫Kit，着逼爆細碼恤衫嘅佢狂電在場女記者，有女記者話佢着恤衫騷唔到身材，佢就用迷人眼神望住個記者，表示認同。仲有位參賽者Clayton，爆鼻爛嘴到場，似同人打完交，記者問佢做乜？佢難以啟齒，連串自己英文名都有困難，只點頭承認喺外國返嚟。另外，有位29歲嘅Derek，係舞台劇演員。
若知道今屆入圍港男的底細，歡迎電郵至mailto:[email protected]報料。