背妻偷食、勾弟婦嘅英超曼聯球星傑斯，隨時好似09年底爆出偷食嘅高爾夫球手活士咁，變咗「活士二世」，所以佢亦好努力箍煲，仲同家人去咗杜拜度假。因為據英傳媒話贊助商或者會因傑斯形象插水同佢解約，其中體育用品公司Reebok為傑斯嘅贊助費高達2,000萬鎊（約2.3億港元），其他贊助傑斯嘅有瑞士名錶PatekPhilippe、Cyma、法國車商Citroen、沙地電信商SaudiTelecom等。之但係傑斯同活士唔同嘅係，佢已經37歲同踢多一年就會收山，絕對冇咩時間畀佢重拾好好先生形象，所以班贊助商可能真係全部離佢而去！至於做咗儍仔硬食8年「綠帽」嘅傑斯細路洛尼（圖）就好傷心，報道話佢已經同傑斯反晒面，仲已經同老婆娜塔莎搞緊離婚。之不過呢次「偷食記」仲未完架，28歲嘅娜塔莎話早前接到神秘女子電話，個女人話佢係傑斯「第3號情婦」，究竟傑斯有幾多情婦？真係要問佢先知。