花旗股市前晚繼續向下，港股假期後復市顯著低開，但恒指靠近250日線買盤較為積極，跌幅逐步收窄，以22868收市，跌80點，陽燭配合成交縮減，港股喺現水平應可暫時企穩。
伯南克噚晚有嘢講，會係市場焦點。花旗股市走勢仍偏淡，睇吓可唔可以借伯南克嘅言論扭轉形勢。道指報12089，短線有力守喺11800樓上，如果升番上12200樓上，港股有機借勢上試23000至23300阻力區。
澳博C輪11547：澳博控股（880）收18.54元，升1.9%。股價下破10日線之後，噚日進一步下試20日線，呈單日轉向高收，周線圖維持向好格局，升破前高位19.42元睇21元，可以諗吓隻C輪11547。
隻輪現價18.4仙，2012年1月3日到期，行使價20.88元，溢價22.6%，引伸波幅48%，槓桿率10.1倍（有效4.5倍），正股升上21元，11547睇31.1仙，正股跌穿17.60元就沽咗隻輪。
俊樺