記協今年為咗籌款，破天荒搞咗個「666智英飯局」，競投者可以去到「肥佬黎」黎智英大宅享用晚餐。飯局噚日6月6日晚上6點舉行，投到三個位嘅民主黨馮煒光、律師會會長何君堯同地產代理商汪敦敬等準時赴會，試咗肥佬黎喺花園親自燒嘅乳豬，同埋親手炮製嘅黃酒走地雞，一眾座上客大讚頂呱呱，估唔到肥佬黎廚藝咁了得，再加上炒翅同響螺燉湯等，個個捧住大肚腩走人。
分享愛體驗
據馮煒光講，肥佬黎暢所欲言，絕無欺場。席間有人提到煲呔好唔掂，作為教友嘅肥佬黎就話，煲呔其實係個好人，但做得呢個位就有好大掣肘，但都承認煲呔近期掌握民情確係麻麻。至於下屆特首，肥佬黎話現有三個熱門中，無論邊個上場都係死路一條，似乎冇一個係佢心水之選。
肥佬黎席間仲分享愛嘅體驗，話前妻曾經喺離開時問佢：你記得我幾時着過呢件衫？結果呢句話成為暮鼓晨鐘，警醒肥佬黎明白對太太要多啲細心兼關心，仲改變埋佢對婚姻嘅睇法。