睽違已久兼剛喺德國開賣無幾耐嘅全新Eos，已搶先到港。全自動硬篷頂已夠引死人，日頭開篷迎風遊車河；夜晚關篷變Coupe，望住頭燈新LED佈局，璀璨得如五彩燈飾，暑假出外玩足AllDay，都係你最搶眼！
記者、攝影：徐影龍
熱血蓋過德國寒風
早前喺日內瓦車展上，開篷Golf現身令全場拍晒手掌，全因VW已好耐無玩樂味咁高嘅開篷車了。雖然開篷Golf到港日期尚屬未知數，但全新Eos已率先抵港，呢款幾年未Upgrade過嘅車，一嚟就帶畀大家唔少驚喜！除改頭換面，仲有大熱硬摺篷頂，開關需時25秒，算不過不失。最正係機械臂唔算粗壯，靈活順暢之餘好慳位，對尾箱空間買少見少嘅Coupe款嚟講，用落就知幾重要。
面對開篷車，我總有點興奮，尤其早前喺德國禾夫斯堡郊區實試新Eos時，開篷行車時聽着呼呼風聲、停車時嗅着樹木氣息，令我感到揸車都有「活着」嘅感覺。儘管今次試車時氣溫低至13℃，但仍無懼冷風吹襲，一直深踩油門發力狂奔。無計，全新Eos用上2,000ccTSI引擎，爆埋Turbo有成210匹，車身嬌小靈活又夠輕，入彎同起步零舍爽，熱血度完全蓋過寒冷急風，更何況踏入炎熱暑假，好玩度將大大提高。
白皮櫳襯得貴氣
舊款建基於五代Golf，Eos哈哈笑大嘴巴車頭，一早已睇到慣，今次順勢換埋六代Golf風格，新的電鍍鬼面罩及霧燈框等，整體感覺帥氣不少。最Sharp醒係全新頭燈造型，一大盞Xenon燈旁，圍住一顆顆LED，炯炯有神都不足以形容，可謂精靈搶眼得近乎招積。晚上停泊喺歐陸式酒店前，璀璨得如節日燈飾，歐系血統的確有不凡之處。
內櫳方面，變化雖不算太大，但仍換上新皮革、軚盤及錶板等，由於屬Coupe車款，座位採用2＋2式設計，後座空間本應無乜期待，慶幸並無中軸凸起嘅頂腳煩惱，坐兩個人仍算合格。米白色皮櫳配襯層次豐富嘅座椅曲線，視覺上相當貴氣，尤其開篷後，淺色內櫳喺深色車身襯托下零舍突出，我又多一個藉口Keep住開篷揸車喇！
NewEos2.0TSI
引擎：1,984ccTSI
馬力：210PS/5,300-6,200rpm
扭力：280Nm/1,700-5,200rpm
傳動：6速DSG+/-波箱
售價：$398,800
查詢：36989688（VolkswagenHK）