墨西哥5:0、哥斯達黎加5:0、牙買加4:0，場場波都係強隊大勝，美洲金盃原來咁好賭o架！咪住，喺呢3場波之後，今屆金盃終於大大鑊爆一鑊；有份參加舊年南非世盃嘅洪都拉斯，竟係11打9之下都贏唔到危地馬拉，慘被悶和0:0，大熱4連環就此斷纜，但買咗佢哋主W同[-1]「主勝」嘅球迷仲慘呀！
打多危軍兩個遭悶和
今屆金盃喺禮拜日開波，首日兩場A組賽事都正路過乜，墨西哥揭幕戰大炒薩爾瓦多5:0；之後嘅哥斯達黎加亦唔執輸，以同樣比數贏古巴。前日進行B組比賽，打頭陣嘅牙買加亦冇甩轆，贈咗4隻光蛋畀格林納達；而接住出場嘅奪標第3熱門洪都拉斯，對住同組另一弱隊危地馬拉，斷估實食冇黐牙，個正選陣雖然冇咗熱刺中場柏拉西奧斯，不過仍有奧士文查維斯同亨特利湯馬士等好手撐場，加上雷蒙紐尼斯同禾達馬天尼斯等亦喺後備席上，熱門又旺，所以主W同[-1]「主勝」齊齊落飛，由1.5倍同2.45倍跌至得番1.2倍同1.64倍。
但波係圓嘅，洪都拉斯雖然控制戰局，仲要喺61同79分鐘因對手有卡比拉同亨利麥甸拿先後領紅而11個打9個，但結果都係入唔到波，以0:0完場，俾危地馬拉爆個5.25倍嘅和波同埋18倍嘅0:0波膽出嚟。洪都拉斯教練路爾斯蘇亞雷斯賽後話：「我哋打成咁，根本唔值得贏波。我哋應該製造多啲空位，但就做唔到。」
洪都拉斯雖然知衰，但就難以平息捧佢哋嘅球迷心目中嘅怒火。墨西哥、哥斯達黎加同埋牙買加都贏得鬼咁易，偏偏嚟到佢哋場波先至嚟甩轆，真係唔嬲就假。被列為冠軍大熱嘅美國今朝會對加拿大，花旗國個W熱到得1.25倍，我求大俠希望好多粉絲嘅美國唔會令球迷失望啦！