煲呔被踢爆名下物業違規圍封露台,佢一度扭扭擰擰,結果唔拆唔拆終需拆,搞到形象大插水。八方嘅同事就爽快得多,上星期四我哋自爆將軍澳工業邨壹傳媒大樓多處疑似僭建後,行政部近日安排工程人員拆走違規建築。
八方記得行政部當日承諾會盡快搵專業人員檢查,確保大樓所有工程合法。八方日前便目擊有工程人員,拆走3樓露台嘅大型簷篷,換成活動式小型帳篷,既符合法例要求,又可以為同事遮風擋雨,兩全其美。至於位於5樓用嚟種蘭花嘅玻璃小溫室,就成個人間蒸發咗,變成一塊平地。正如林公公所講,主動清拆疑似僭建,可以釋除外界疑慮,八方相信壹傳媒大樓僭建事件可以告一段落。