一心諗住喺鳥巢睇米蘭打吡戰，甚至買埋飛嘅朋友，小心！關於紅黑、藍黑兵團齊齊放飛機嘅傳聞越傳越盛。到底係米蘭雙雄唔想賺人仔，抑或係想搵多啲，到呢刻至吊高嚟賣？若然真係嫌錢腥，連大陸呢隻金蛋都唔捉實，意大利唔只足球退步，營商更水皮。
賴南美兵或未歸隊
多份意大利報章喺上周六已經放風，米蘭雙雄唔想踢8月6日喺鳥巢舉行嘅意超盃，據消息人士講，兩隊係以陣中好多南美國腳（例如國際米蘭嘅辛尼迪、甘比亞素、盧斯奧、迪亞高米列圖等人，而AC亦有羅賓奴、柏圖、耶比斯等人）要參加下個月嘅美洲國家盃，到8月頭就踢意超盃，怕且好多國腳都以未歸隊為理由，唔想求其派隊波就算。據聞兩隊已經有共識，想場波推遲到8月21日，地點仲要係由鳥巢變返米蘭。
關於呢單大嘢，意大利球員協會會長湯馬士承認「場波喺鳥巢踢嘅難度好大，兩隊波都企硬。」兩間球會暫時冇表態，而意大利聯賽會負責交涉，各方代表喺意大利時間禮拜一開會後，或者就有定案。我求大俠就咁聽就覺得件事離譜，嘩，你哋話晒事咩？有冇理過中國球迷嘅感受？
主辦單位飛照賣
老實，類似比賽肯定一早已經定出賽期，而兩隊冇可能唔預計埋美洲國家盃因素。至於中國主辦單位亦要負責，因為最初同意大利聯賽會簽落嘅合約，係2010年至2014年，其中3年意超盃喺中國上演，亦即係話米蘭雙雄真係唔派隊，都唔算毀約。主辦單位有理冇理，當然繼續賣飛，據講799元或以下門票早被沽清，而899元或以上門票嘅銷情好好，買咗飛嘅可能空歡喜，到時退票亦可能搞餐死。
難得意大利波早就喺中國入晒屋，如果米蘭雙雄今次真係齊放飛機，傷透中國球迷嘅心，損失嘅點只係戲金？已有球迷喺網上大鬧無恥，又有人話英超勻真得多，亦有話意大利全部假波，唔睇罷就……死未？