「為公為民，要做選民」。公民黨今日開始巡迴各區擺街站，呼籲市民登記做選民，以便喺今明兩年嘅區議會同立法會選舉投票。黨魁梁家傑希望市民珍惜選舉權，「對民主嘅尊重，要由自己開始。」
公民黨集中火力動員新生代，特別係今年9月25日或以前年滿18歲嘅年輕人要喺7月16日前向選舉事務處登記做選民，以便可以喺11月初嘅區選同明年底立法會選舉投票。佢哋話，年底選出嘅新一屆區議員，不但有機會成為選委會委員，可以投票選特首，仲自動擁有參與新增「超級區議員」選舉嘅入場券，因此今年區議會投票權有更大影響力，市民要積極參與。