美國NBA決賽，由MiamiHeat對DallasMavericks，前者譯做熱火，後者叫做乜？六月五日《蘋果》體育版講NBA，AA8版有一段now寬頻電視廣告：「熱火VS小牛」，但《蘋果》體育嘅新聞標題係「唔怕火燒，小馬擺陣爭連勝」，一版之內有兩個譯名，學生豪問左丁山：「《蘋果》啱還是now廣告啱？」
查字典啦，查「朗文當代大辭典」與牛津AdvancedLearner's，都只係解作異見者，但網上Dictionary.com就除咗異見者之外，仲有一個解釋，就係無烙印，離群動物，特別係指calf（小牛），呢個字義在美國西南部盛行。達拉斯就在德薩斯州（Texas），傳統上牧牛場所在地，故此DallasMavericks譯做達拉斯小牛，應該係啱嘅，達拉斯位現時班主MarkCuban本身就係一位挑戰權威（屢被NBA罰款），行事風格獨特之人，自己就係一位maverick。球隊名字來自1957-1962年嘅美國西部片集Maverick，主角人物就係占士加納，當時占士加納係球隊股東之一。球隊名字縮寫就係Mavs，或者《蘋果》就係咁叫，將隊名譯為小馬。
小牛上次對熱火爭冠軍，係在2006年，當時小牛贏咗頭二場，第三場形勢大好，曾領先甚多，點知最後守唔住維特，反勝為敗，之後再輸三場，讓熱火奪標，主將奴域斯基抱憾至今。今年又如何呢？熱火牌面佔優，三大巨頭onfire，打出火嘅話，小牛枝德國槍能否滅火，係好大疑問，熱火可以睇高半線。
呢輪睇波好唔得閒，有NHL決賽（溫哥華對波士頓），有NBA決賽，有法國網球公開賽決賽，上星期六晚同時又有葉森打吡，李娜爭標，歐洲盃外圍賽英格蘭對瑞士，搞到我地成晚轉台，當中梗係以李娜創造歷史，成為第一位女子亞裔贏到法國公開賽，最令人感動啦。李娜成功，背後有一段辛酸史，佢亦算係一位maverick，先至有勇氣打破中國運動員身上之框架，勇闖世界，據講佢每日嘅開支係一萬五千元人民幣，相當龐大，好彩呢次一下子就贏到一百二十萬歐元，今年夠晒數。