意大利名牌Prada（1913）嚟香港上市，已經去到如火如荼嘅階段，噚日開波喺新加坡做投資者推介，今日輪到香港，聽聞行政總裁PatrizioBertelli同總裁MiucciaPrada兩夫婦都會齊齊現身推介會，金融界嘅Prada擁躉有幸一睹佢哋嘅風采。
基金打人情牌 都冇面畀
至於今日傍晚喺灣仔君悅舉行嘅投資者推介會，華華收到風，唔止推介會咁簡單，開波前會有半粒鐘花生騷。唔知係金融界有太多Prada擁躉，定係佢哋知道Prada今年秋冬系列有「睇頭」，吸引大批基金經理想出席，喺中環可謂一票難求，即使大型基金嘅基金經理出動人情牌、話自己個fund規模幾大，有關方面都冇面畀。
今晚嘅推介會由保薦人高盛同里昂負責，得幾百個位，佢哋梗係精挑細選，邀請最優質、最大嘅客戶出席。除咗基金客，仲有大批私人銀行客戶，呢班客畀咁多錢佢哋管理，點可以待慢？
根據行程，Prada呢兩日喺香港做完推介，之後會去倫敦、米蘭、紐約同波士頓，全程由Bertelli帶領一班管理層進行，聽聞MiucciaPrada未必全部隨行，因為香港有時裝表演，MiucciaPrada先至要跟足。所以話，香港嘅投資者真係幾幸運o架！
李華華
mailto:[email protected]