前年太太生咗對龍鳳胎嘅星級分析員張一鳴（Derek），據聞有新動作。華華收到風，Derek俾獵頭公司獵到，已經離開DBS唯高達。唔知邊間行高薪挖走佢，華華即刻打電話問佢本人，Derek話的確已經離開咗DBS兩個星期，家陣有嘢搞緊，遲啲落實咗就會講畀華華聽。
Derek係典型香港仔，打得砌得肯搏肯捱。91年理大會計系畢業，未畢業已經入咗當年嘅八大會計師行之一──安達信會計師行。94年過檔萬國寶通銀行，即係家陣嘅花旗。97年樓市火熱，佢拜到名師米高堅門下，開始做地產分析。
一般分析員睇市準，但自己未必敢真金白銀買落去，Derek就唔同，03年沙士，樓市大跌，佢用呎價3200蚊買咗西半山嘉兆臺，家陣呎價3200蚊連公屋都未必買到。05年初由sell-side轉做buy-side，加盟Cohen&SteersAsia做芬佬，今次轉職，唔知開邊瓣？