郭富城（Aaron）一直好鍾意睇跑馬賽事，因為佢覺得馬嘅跑姿係非常優美，又可試驗自己嘅眼光。上年佢就試吓申請做馬主，結果仲俾佢好幸運咁抽到，開心到佢死，隻馬今年9月馬季開鑼時就可以出賽啦！佢仲好希望可以拉到頭馬，然後同班朋友一齊分享呢個喜悅。
四人夾份抽馬
Aaron除咗個人喺上年做咗馬主外，今年佢又聯同老友張智霖（Chilam）、周文曦同陳汝安夾份入紙申請2012至2013年度自購新馬，結果又俾佢抽到，佢家貴為兩馬之主啦！不過隻馬要出年先嚟得，所以冇咁快可以睇到第二隻馬出賽。
Chilam：湊熱鬧
馮仁昭噚日打畀Chilam，佢知道自己做到馬主開心話：「乜咁幸運，第一次申請就可以抽到，其實我對養馬冇乜概念，都係曦哥（周文曦）負責去搞，我哋幾個都係馬會會員，又鍾意睇跑馬賽事，加上參與賽事又可以做到善事，咁我覺得做馬主都幾好，至於養隻馬要幾多錢，我都唔係咁清楚，今次都係湊吓熱鬧咋！」
