梁靜茹嘅世界巡迴演唱會，前晚喺紅館展開一連三場嘅香港站，靜茹嘅好友李心潔同許茹云都有嚟捧場，錢國偉就帶咗三個妹妹仔睇騷。
靜茹搵咗陳孫華設計六套舞衣，佢又不時換鮮色假髮，都幾搶眼，其中一件黃色羽毛裙襯紅假髮，就俾微博網友笑指似AngryBird（憤怒鳥）。而最性感嗰件bra型舞衣，就令靜茹嘅豐滿上圍好突出。靜茹之前跟SunnyWong學舞，今次當然要表演一下，靜茹話：「跳舞真係好難，我向來係抒情歌手，跳熱舞有啲唔慣。」
吊半空出場
出場時，靜茹坐喺個海豚形嘅架上，離地五層樓高，架上有安全帶，佢就周圍郁向觀眾揮手，靜茹仲話：「呢part最好玩，我綵排時好開心，希望呢part大家都難忘。」後來好多歌迷獻花，靜茹叫大家唔好嘥錢，以後送一支就夠，佢又用國語感謝歌迷：「你們給我的東西，遠比我能夠給你們的還多。」