好好先生傑斯早前被踢爆背妻偷食後，搞到形象盡毀，咁都未算，仲衰到勾弟婦；佢弟婦娜塔莎日前出嚟爆料，話同呢位曼聯球星有長達8年嘅不倫關係。睇嚟傑斯句經典廣告對白「Ihopethismatchneverends」都要變做「Ihope啲衰嘢快啲end」！
被爆上床8年
結咗婚同有兩個小朋友嘅傑斯，縱橫球場20年，絕少負面新聞，被公認為球壇嘅好好先生，仲因此而成為銳步、鐵達時同埋施馬等品牌代言人，令佢進賬逾3,000萬鎊（約3.8億港元）。不過，呢位留效曼聯至明夏嘅37歲球星，早前被揭發搭上前威爾斯小姐兼真人騷女星托瑪絲，令佢喺一夜之間變賤男。背妻偷食都夠衰，佢仲賤到自己細佬洛尼個老婆娜塔莎都唔放過。
娜塔莎啱啱喺周日出版嘅英國《世界新聞報》內爆料：「傑斯同我有8年曖昧關係。我之前一直保守呢個咁可怕嘅秘密，但我唔想再埋沒自己嘅良心，亦唔想再講大話，咁對我先生洛尼同啲細路都好唔公平，所以我決定講出嚟。」現年28歲嘅娜塔莎話，佢喺03年3月於曼市一間夜店認識傑斯，第二晚仲識埋傑斯細佬洛尼，而且仲喺洛尼朋友一間屋內同傑斯上床，事後亦知道傑斯有另一半斯泰茜兼就快做老竇。
嬲傑斯 弟婦爆大鑊
之後佢喺03年5月同洛尼開始拍拖，仲喺舊年6月成婚，但喺過去8年仲一直同傑斯暗交，而且每次見面都會有性行為；直到今年4月，佢知道傑斯偷嗒托馬絲，先下定決心停止呢段不倫關係。
娜塔莎話：「傑斯徹徹底底出賣咗我，佢從來冇對我浪漫過，亦從冇講過愛我。我哋嘅關係，全係建基於性愛。」娜塔莎明知傑斯有家室都樁個頭埋去，而且同洛尼拍緊拖都冇拒絕傑斯，好明顯佢都好有問題。不過，一隻手掌拍唔響，如果真有其事嘅話，傑斯肯定要負最大責任，而且仲衰到搞細佬個老婆，我求大俠真係唔知佢點面對自己屋企人。