六四燭光集會，八方除咗諗起華叔，亦諗起「事旦男」，事關佢當年就係喺六四20周年集會上舉牌諷刺CCTVB（無綫電視）事事旦旦。自此之後，觀眾就好關注電視台報道六四嘅比重同角度，有心水清嘅市民話，今年CCTVB對燭光集會嘅報道仍秉承事旦作風。
當晚一直喺電視收睇新聞嘅市民報料，話亞視喺6點新聞對六四22周年嘅報道，足足有成10分鐘咁長，香港、內地同台灣點悼念通通報齊。反觀CCTVB嘅六四報道，唔夠5分鐘，求其講吓維園同北京情況就算，輸足亞視一條街；就算晚間新聞，相關報道都係多過6點半新聞一分鐘咁多。
《撳錢》藏六四訊息
反而，小小超揸fit嘅「now101台」，疑喺大熱節目《撳錢》中暗藏六四訊息，當晚第一條問題係：張德培喺邊年成為法國網球公開賽男單冠軍，答案係1989年。緊接第二條就係根據國際網球聯會規定，網球場嘅發球線與底線同球網平行距離要幾多米？答案咁啱得咁蹺就係6.4米。究竟呢啲係有心抑或無意？心水清嘅市民一定有答案。