華瀚生物製藥（587）半年度業績靚仔，有產品優勢，全年度業績料繼續靚爆鏡，華瀚要買。華瀚主打祖國婦科藥品，單係2010年半年度（12月結），純利就增長咗近2.9倍到2.7億銀。均真啲，扣埋集團出售公司溢利1.47億銀，總溢利都大幅增長77%，靚仔到痹。祖國家陣已經係全球第5大藥物市場，估計到2018年，會取代日本成為第二大市場，華瀚有龐大內銷市場Backup，長賺長有。
再講，集團以「婦科再造丸」做代表嘅系列產品，亦打入祖國同類產品銷量前4位，睇到華瀚藥品有好大競爭優勢。係咁意計數，華瀚2011年全年度純利3.9億銀，預期PE跌到得9.7倍。博現價升四成到3.15元，PE不過13.6倍。
錦興價殘長短棍出擊
錦興（275）現價0.305元，比起集團今年4月合股後供股成本價0.30元，都係差無幾。就算計埋集團大折讓供股，最新NAV都係講緊每股2.38元，大幅折讓86%，即係話，錦興現價係NAV一折幾有售，殘到爆。一於長、短棍，一注擺長線，博錦興大茶飯；一注短打博升20%到0.37元，到時，集團嘅折讓，仲係高達87%。
錢雋