人民幣近年氣勢如虹，呢股「人仔力量」仲殺入維園，為平反六四出一分力！支聯會副主席蔡耀昌同八方講，燭光集會上支聯會總共籌到131萬，當中有萬六蚊係「人仔」，比起舊年得7,500蚊，足足多咗一倍。
八方對比番前兩年支聯會喺燭光集會上籌款金額，舊年有141萬，前年20周年就豐收221萬，今年好似回落番啲。蔡耀昌解釋，舊年發生「強搶民女」事件，唔少人搶購民主女神像，一個賣200蚊都賣清光，今年支聯會冇特別推出紀念品都有咁嘅成績，已經唔錯。
不過，公民黨同社民連向八方呻，話當晚警方7點幾開始封路，搞到佢哋喺維園噴水池同糖街嘅攤檔做唔到生意，埋單計數，公民黨籌到13萬，社民連有10萬，都比往年遜色。