美斯遇襲！冇事，好在！一宗在新聞台本來是突發新聞的大事，卻因為美斯極速公開表示：「冇事，乜事都冇！」而火速成為一宗碎料。大事能夠化小，不因美斯塊面無傷痕，而是因為大人不記小人過。
近排天氣熱人易躁，翻開報紙、又或走在鬧市，觸目所及都是鬥氣事件；不是你踩親我、就是我撞親你；你話我冇禮貌、我話你嘈生晒！有人歸咎是境太迫，也有人說是耐性冇晒，再係咁落去，大家累鬥累，後果堪虞……
好在有美斯！
睇美斯踢波，本來就是賞心悅目的事，除機靈輕巧的行雲流水演繹漂亮足球之外；睇深一層還相當有教育意義。那些像ETV一般的教細路片段，在於每次美斯被人撞跌、踢跌、勾跌或掃跌後，他的即時反應，都是儘量第一時間起身（太嚴重當然例外，touchwood！），而他起身的同時，口裏永遠不見會口噏噏，反而已眼仔碌碌在尋找隊友，製造機會，他可能是把握快開罰球變成入球的最強一人！
點解美斯被撞跌可以不演戲不投訴呢？原因很簡單，因為他清楚自己落場的目標，不為博同情，不為迫對手攞牌，只為入波爭取勝利，所以對他來說是講多無謂，跌倒當鼓勵。
天熱人躁最易起火的地點，其實不是鬧市是球場，因為大家都有點立心不良。當一場友誼波展開之後，通常一下碰撞之後的第二句對話是相當關鍵！
「有冇搞錯呀你！」被踢倒的先開口……
「咩呀，踢波唔撞得呀，去打乒乓波吖！」如此回應，開片是正常後果……
「唔好意思，sorrysorry！」但若如此回應的話，就真係嬲佢唔落，仲焗住要扮大量講聲，「小事小事，我自己企唔穩啫！」小事因此化無。
波學唔到美斯，品可以學嘞啩。
文：keyman